Chite lui humhalh hna chak zawka hmalak rel

Save Chite Lui Coordination Committee (SCLCC) chuan Thawhṭanni tlai khan an patron, Governor Lt. Gen. Nirbhay Sharma hoin an ṭhukhawm a; Chite lui humhalhna atana an hmalaknate chu kumin chhunga a lan ngei theih nan chak zawka hmalak a, hmalakna huanga mipui náwlpui sâwm luh an rel.

Larsap chuan, Chite lui chhanchhuak tura hmalakna kal zel chu India ram pum tana entawn tur tling khawpa kalpui theih a nih thu a sawi a, "India ram hmun tam taka an hlawhchhamnaah Mizoram hi a hlawhtlin ka ring. Mizote chuan sakhaw thuhmun, ṭawng thuhmun kan neih bakah vantlang tana feh chhuahnaah kan chian avangin hlawhtlinna lian tak kan nei thei. Chite lui fai leh mawi buatsaih hi Mizo mipuite'n kan Krismas thilpek atan puitlin i tum ang u," a ti.

Chite lui chu Aizawl khawpui timawia tinuam thei tura awm, a nihna leh mawina hloh tawh siam ṭhat ngai a ni tih sawiin Governor chuan, "Khua leh tuite pawhin thil ṭha siam turin sum kan theh chhuah phal a ngai ve ṭhin a, Chite lui tihthianghlim nan kei pawhin ka thawh ang a, mi ṭhahnemngaite pawhin tlemlua awm loin thawh theih vek i tum ang u," a ti a; chak taka chet chhuah a ṭul thu a sawi.

Chief minister Lal Thanhawla pawhin thu sawiin, an naupan laia Chite lui a hriat ṭhin, lui lian pangai tak, sangha lian deuh zawk, nghatunte pawh awmna leh lènkhang zâr theih khawpa lian a danglam ta lutuk leh ṭawp ta lutuk chu pawi a tih thu a sawi a, "A siamṭhat nan khua a tlai lo. Chite lui a dam khawchhuah leh nan lui kama mimal ram neitute leh Chite lui fintu lui tê zawk kama mimal ram neitute'n rilru zau taka an ramah thing leh mau phun an phal a ṭul," a ti.

Chief Minister chuan, Chite lui chhanchhuak turin Chite luiin a luan tlang MLA constituency pariata MLA-te pawhin MLA Local Area Development Fund aṭangte pawha sum theh chhuah an harsat a rin loh thu sawi bawk.

SCLCC hian kumin Krismas hma ngeia Mizo mipuite hnena Chite lui fai leh thianghlim zawk pe tura hmalakna atan September 29-ah leh November 24-ah Aizawl khawpuia zirna in hrang hrang 24-a NSS volunteer-te’n ‘Chite lui tihfai hnatlangpui’ an neih dan tur an rel a ni.