Kawlphetha tihpun dan hmuchhuak

Laldinthara, Dinthar, Aizawl chuan nimin khan Aizawl Press Club-ah thuthar thehdarhtute kâwm­in, kawlphetha (electric power) hmangin hman zat let sarih vela tam siam dan a hmuh chhuah thu a puang.

Laldinthara sawi dan­in, electric motor phase thum (three phase) 10 hp engine-ah hmangin, chu chuan kawlphetha kilowatt 7.5 a hmang a, chumi chakna hmang chuan dynamo kilowatt 50 a tihvirtir a ni. Dynamo chu minute khat chhunga vawi 1,500 virtir a nihin kawlphetha kilowatt 50 a pe chhuak thei a ni.

Electric motor leh current siam chhuaktu dynamo inkarah a rem­hriatnain motor-a hman chi part chi hrang hrang rem khawm­in, accelerator a siam chawp tih sawiin Lal­dinthara chuan, "Minute khatah vawi 1,500 chu ka virtir a, accelerator ka siam chawp hi rin ai daihin a ṭha a, minute khatah vawi khat lek pawh a tihvir theih a, duh chuan vawi nuai 10 pawh a tihvir theih dawn a, duh zat zat a tihvir theih dawn a ni," a ti.

Laldinthara chuan, electric current hmanga electric current vêk a lêt sarih chuanga tam siam chhuah dan a hriat chhuah chu ṭangkai zawka hman a nih theih nan a ṭhian­te nen hma an la tih a sawi. Power & Electricity department hotute leh power siam chhuahna lam buaipuitu company hrang hrangte an biak tawh thu an sawi rualin, an hmasawn zelna tur thu an la dawn loh thu an sawi bawk.