KHAWTHLIR

Teacher Award
India rama zirtirtu hna thawk ṭha chawimawina sâng, National Award to Teacher chu nimin khan Rashtrapati Bhavan-ah vice president M Venkaiah Naidu-a'n a dawngtute hnenah a hlan a; Mizoram aṭang­in zirtirtu pahnihih - C Remsanga, headmaster, Bungtlang High School, Serchhip district leh, V Lalrinmawia, headmaster, Pukpui Middle School, Lunglei district-ten an dawng.

Faina hnatlang
Mizoram State Rural Livelihood Mission (MzSRLM) hnuaia Sangau-II V/C huam chhunga self help group (SHG) 10 member-te ­chuan Teachers Day pual­in nimin khan Sangaua SDO (Civil) leh BDO pisa chhehvel tifaiin an hnatlang. Sangau RD Block chhungah MzSRLM hnuaiah SHG 201 a ding tawh a, Sangau khaw chhung bikah SHG 40 a ding tawh a ni.

Education campaign
Chhipphir Education Wor­k­ers Association chuan nimin khan an khuaah Zirtirtute Ni pualin Education Campaign an buatsaih a, Serchhip DEO Lawmawma'n a hmanpui.

Knowledge Centre
Mizoram State Entrepreneurship Development Monitoring Committee (MEDMOC)-te'n ZIDCO building-a Entrepreneurship Knowledge Centre an din chu nimin khan Commerce & Industries minister H Rohluna'n a hawng. Centre-ah hian training hall, entrepreneur-te tana ṭangkai tur lehkhabu, internet hmanga hmun dang dawr theihna turte dah a ni a; loan leh sum dilna tura DPR mamawh siam duhte ṭanpuina hmun tur a ni.