Treasury-in sum pek chhuah theih zat a bithliah leh tawh

Mizorama Treasury lian ber, Aizawl South Treasury chuan hun eng emaw ti chhung ni khata sum pek chhuah theih zat (ceiling) a neih loh hnuah tun hnai khan a nei leh tawh. 

Vanglaini thu dawn danin, Covid-19 vanga inkhàrkhip kalpui a nih ṭan tirh aṭangin sum dinhmun a ṭhat loh avangin Aizawl South Treasury hian sum pek chhuah theih zat bithliah (ceiling) a nei lo a, sorkar hnathawk hlawh, buhfai leina man leh Finance department-in pe chhuak tura a tihte chauh an pe chhuak ṭhin.

Aizawl South Trea­sury hian hun eng emaw ti chhung chu ceiling ni khatah cheng nuai 200 an nei ṭhin a, chumi hnuah cheng nuai 130-ah tihniam niin, Covid-19 lên hma thleng khan chu chu hman a ni. Covid-19 vanga inkhàrkhip kalpui a nih aṭangin ceiling siam a ni lo a, tun hnai khan ceiling chu cheng nuai 65-ah an bithliah a, chu chu a hmaa ceiling nuai 130 aṭangin a hma aia 50%-in a hniam zawk a ni.

Ceiling hi cheng nuai 65 ni mah se, Aizawl South Treasury chuan ni khata cheng nuai 1,000 pek chhuah ṭumte pawh an nei tho a; Finance depart­ment-in pek chhuah tur a tih chuan ceiling aia tam pawh an pe chhuak ṭhin. Supply leh contract bill lutte chu Treasury chuan an pe chhuak zel a, an pek chhuah tam ber chu sorkar kum hmasaa mi K-deposit-a dahte a ni. Tun dinhmunah chuan supply leh contract bill lut tawh, sum la pek chhuah loh a awm mang lo niin an sawi.