Khârchhâwngtute laka kut hnathawktute Chhanchhuah a hmanhmawhthlak - CM

NEDP hnuaia thingtlanga kut hnathawktute tihhmasawnna tur, United Nations Development Programme (UNDP)-in a duan zirchianna hun nimin khan CMO Cabinet Room-ah buatsaih a ni. Chief minister Lal Thanhawla chuan, khârchhawngtute lak aṭanga kut hnathawktute chhan chhuah chu thil hmanhmawhthlak a nih thu a sawi.

Chief Minister chuan, kuthna­thawktute'n lei rem an rah hun leh eizawnna ngêlnghet an neih hma chu ramin hmasawnna kawng a zawh tak tak thei lo tih sawiin, "Khârchhawngtute leh middleman-te lak aṭanga kut hna­thawk­tute chhanchhuah hi thil hmanhmawhthlak a ni," a ti.

Kut hnathawktute thawh chhuah tihpun leh sumdawngte pawhin tam an tih zat lak khawmsak a nih theih nan a kaihhnawih sorkar department-te an ṭan mar pát a ngai tih sawiin Lal Thanhawla chuan, "Mizorama thlai tharte hi hriselna atana ṭha, organic product vek a ni a; Mizoramin a châwk luhte chu hriselna atana him lo, damdawi hmanga enkawl a ni," a ti a; Mizoramin a thar chhuahte ngaihhlut nacháng hriat a pawimawh thu a sawi.

Planning minister Lalsawta pawhin thu sawiin, kut hnathawk­tute'n eizawnna ngêlnghet an neih a, an thlai tharte hlâwk zawka an hralh theih chu sorkar thil tum a nih thu a sawi a, "Kut hnahnawktute thlai tharte awmze neia suma chantir turin entrepreneur-te tan hmun a awm. Mizorama thlai tharte hi a man tur dik tak, a leitu mipuite tana sum hlohna emaw, hekna tur awm loa kalpui thiam a pawimawh," a ti.

Meeting-ah hian thingtlanga kut hnathawktute'n anmahni ei tur leh tualchhunga an hralh aia tam buh leh bâl an tharte sum leh paia awlsam zawka an chantir theihna tura UNDP-in ruahmanna a buatsaihte thlirho a ni a, kalpui theih dan tur an sawiho nghal.

UNDP hian kut hnathawktute tihhmasawnna atan Village Level Development Programme (VLDP) an duang a, chuta tan chuan cheng nuai 5,100 mamawh tura ruahman a ni.