VC dah phûtin MZUSC huaihawtin MZU zirlaite leh thawktute dan an ni

Mizoram University Students Council (MZUSC) chuan, MZU-ah vice chancellor (VC) nghet dah phûtin nimin khan zirlaite leh zirtirtute leh thawktu dangte an dang a; hei vang hian class neih a nih loh bakah, MZU-a programme pawimawh dangte pawh neih theih a ni lo.

MZUSC hian VC nghet dah turin Union minister for Human Resource Development (HRD) Prakash Javadekar hnenah August 28, 2017-ah ngenna an lo thlen tawh a, chutah chuan September 5, 2017 thleng an nghah tur thu an ziak.

An nghah theih hun, September 5-ah pawh VC nghet dah a nih tak loh avangin, an thurel tawh angin nimin aṭang khan MZU-a academic leh non-academic activity zawng zawng tih a nih loh nan an indang ta a ni.

MZUSC chuan, VC nghet dah turin vawi eng emaw zat sorkar laipuiah ngenna an thlen tawh tih tarlangin, "MZU Teachers Association pawhin press conference hial an nei tawh chungin Central aṭangin chhànna kan hmu mai lo. Chhanna kan dawn loh avangin MZU-a academic leh non-academic activity zawng zawng kan dangchat ta a ni," an ti.

MZU-a zirlai kal khawmte hian resolution siamin, 'Mizoram University-in Vice Chancellor nghet a neih hma chu academic and non-academic activity zawng zawng dan chah ni rawh se,” an ti.

MZUSC chuan, MZU VC nghet neih an phûtnaah Mizo mipui ṭawiawmna an ngen a, "Kan thil phût tihhlawhtlin a nih theih nan a ṭul ang zelin zau zawk leh nasa zawka hmalak kan tum mek a ni. A hma thei ang bera regular VC neih kan duh a, buaina nasa zawk leh zirlaite tawrhna nasa zawk a thlen hma ngeia VC nghet min pek kan beisei tlat a ni," an ti.

MZUSC-in MZU chhunga thil tih tur reng reng an dan avang hian, vawiina MZU Students Discussion Forum-in 'Youth and Politics in India' thupui hmanga national level workshop neih tur pawh ṭhulh a ni.

Workshop hmanpui tur hian Meghalaya Lok Sabha MP Conrad Sangma leh Meghalaya MLA James Sangma te pawh an rawn thleng tawha thu dawn a ni.