Topper-te hnenah CM Award hlan

School Education department buatsaihin nimin khan an directorate conference hall-ah High School Leaving Certifcate (HSLC) leh Higher Secondary School Leaving Certificate (HSSLC), 2020 exam-a topper-te hnenah nimin khan Chief Minister's Award hlan a ni a, chief minister Zoramthanga'n a hmanpui. 

Chief Minister chuan, HSLC leh HSSLC topper-te chu a lawmpui thu hrilhin, "In taimakna rah in hmu a ni. Mihring nunah, a bik takin zirlaite zingah taimakna leh tumruhna hian thil a tih theihzia hriat thar a pawimawh. Mihring rilru, ngaihtuahna leh tha hian kan beisei leh hriatthiam phak bakin thil a ti thei a, thei nia kan inhriat tlat chuan hlawhtlinna kan chang thei a ni," a ti.

Zirlaite chu inthlahdah lo tur leh an tumah beidawng loa theihtawp chhuah zel tura chahin Zoramthanga chuan, "Mahni talent ṭheuh hmang ṭangkai zel ang che u," a ti a; zirlai an beisei anga hlawhtlinna chang lote chu beidawng mai loa theihtawp chhuah zel turin a chah bawk.

School Education minister Lalchhandama Ralte pawhin thu sawiin, hri léng vangin kum dang angin a lawmna huaihawt theih ni lo mah se, topper chhuanawm tak tak, chawimawi phu tak takte tana hun tawitê tal hman a ni thei chu lawmawm a tih thu a sawi a, "In kal zelna turah hlawhtlinna chang chhunzawm zel turin duhsakna ka hlan a che u," a ti.

Inkhawmah hian HSLC topper mi pathum leh HSSLC topper mi palite hnenah thuchei leh Rs. 50,000 ṭheuh hlan a ni.