Mizoram minister hlui Zakhu Hlychho a thi

Mizoram sorkara minister hlui, Zakhu Hlychho (75), Siaha Bazar chu nimin chawhnu dar 2 rîk hma deuh khan stroke vangin Aizawl Civil Hospital-ah a thi a, vawiinah Siaha-a an inah vui a ni ang.

Zakhu Hlychho hi Amobyu khuaah Decem­ber 15, 1943-ah a piang a, thiamna lamah B.A a ni a, a nupui Suipari nen fanu panga leh fapa pakhat an nei.

Mara Autonomous District Council (MADC) pian hma, Pawih-Lakher Regional Council a awm laiin chief executive member (CEM) hnuhnung ber a ni a, kum 1972-a MADC a pian hnuah inthlan a nih hmaa sorkar lailawkah CEM a ni bawk.

Kum 1987 leh 1989-a Mizoram Assembly inthlanah MNF ticket-a a tlin loh hnuah, kum 1993-ah MNF ticket-in Saiha bial aṭanga thlan tlin a ni a; kum 1994-ah sorkar lai Congress party-ah lutin, minister of state a ni zui a, Congress sorkar tawp lamah cabinet minister a ni.

Minister a nih chhungin Transport, Fisheries, LAD leh Horticulture department-te a enkawl. Kum 1998 Assembly inthlanah Congress party

aṭangin a tling leh a, opposition leader-ah a awm zui a ni.

Zakhu Hlychho ruang hi Chal­tlanga an inah lak a nih hnuah, nimin tlai khan Siaha panpui a ni a, vawiinah vui a ni ang.