Grape thûr lutuk tihziaawm tum a ni - Rajya Sabha MP

Rajya Sabha MP Ronald Sapa Tlau chuan, Champhai leh Hnahlana thar chhuah grape thûr lutuk tihziaawm a nih theih nan Japan thiamna hmanga hmalak tum mek a nih thu a sawi.

Tun hnaia Kolasib Dis­trict MJA-te nen Delhi-a a chennaa an inkawmnaah Rajya Sabha MP chuan, Hnahlan leh Champhai vela grape-te chu a thûr avangin harsatna an tâwk tih a sawi a, "Hei vang hian Japan thiamna hmangin a thûr a tlem theih dan tur kawng zawn mek a ni. Japan aṭangin mi mithiam pahnihin an rawn enfiah tawh a, grape a thlum theihna tura leiṭha an pek bakah a rah hun sawn an rawt a, enchhin tum mek a ni," a ti.

Ronald Sapa chuan, a hmalaknain Champhai district-ah apple chîn mek a nih thu sawiin, "Apple-te hi Himachal Pradesh-a vûr tlak lohna hmuna chîn tura a hranpaa an siam a ni a, Mizoramah a chìn ve theih dawn em tih enchhin nan kûng 200 la chhuakin, Champhai district-a mi ṭhen­khatte chintir an ni a, kum­in khan rah ṭanin a thlum tui hle," a ti.

Kolasib district MJA-te chuan Rajya Sabha MP hnenah hian Parliament House an tlawhnaah a lo dawngsawngtute'n MP-te'n Parliament rorel chhim turin an bial aṭangin mi 50 thleng an hruai theih thu an lo hrilh tih an sawi a, Mizorama zirlaite tan kawng dapsak turin an ngen a ni.