Lottery leh Zo Carbon chungchangah MNF-te'n CM Lal Thanhawla an hmu

MNF general headquarters leh MNF ṭhalaia hruaitute chu nimin khan Chief Minister's Office (CMO)-ah an kal a, chief minister Lal Thanhawla hnenah lottery sum chingpen leh Zo Carbon-a sum eirûkna a awm nia an hriat chungchang CBI chhuitir tura ngenna lehkha an thehlut nawn.

MNF-te hi general secretary C Lalrammawia hoin secretary leh MNYF hruaitu te, an vaiin mi 70 vel CMO tualah an kal a; lottery leh Zo Carbon chungchang CBI chhuitir tura CM an ngen bakah, CBI chhuitir a nih loh chuan Court hmangin emaw, kawng dang aṭangin CBI kuta dah tura hmalak chhunzawm an tum thu an thlen a ni.

MNF tarlan danin, Zo Carbon chhui tura CBI ko lut tura ngenna, CM-in a tifel tawh anga a insawi, lehkha Memo No. C.31016/55/2016-VIG dated 9th. June, 2017 chu a sûtna lehkha Memo No.C.31016/55/2016-VIG dated 31st. July, 2017-ah tihchhhuah a ni.

Lehkha sût chhan - 'In the interest of public service' tih lehkhaa inziak chu sawi chiang deuh turin MNF hruaitute chuan CM Lal Thanhawla an ngen a; CM chuan, 'High Court-ah Ruatfela Nu-in PIL case a thehluh thubuai kal lai a nih avangin CBI koh luh hi a rem lo,' tiin a lo chháng.

Lottery chungchangah distributor-te inkhinna a awm rih avangin CBI chhuitir a rem rih lo anga ziah pawh MNF chuan, a rem lohna a awm an hriat loh thu leh hriatthiam har an tih thu an sawi a; a rûka hêl tumna awm nia an hriat thu CM an hrilh chungchangah CM chuan, 'Kan lawyer-te min hrilh dan a ni a, a tih dan in hria a nih chuan lehkha rawn siam ula, hming ka lo sign ang. Ukil dangte pawhin lehkha lo siamin Lottery chungchang hi Home minister Rajnath Singh-a hnenah pawh lehkha an lo thehlut a, vawiin thlengin engmah an la rawn ti lo. Home Minister-ah a tàwp tawp mai a ni,' a ti niin an sawi bawk.