Sports dept.-in thisen pek rûnpui buatsaih

Sports & Youth Services department chuan nimin khan Aizawl Civil Hospital (ACH) Blood Bank-ah thisen pek rûnpui, 'Voluntary Blood Donation Drive' an huaihawt a, minister H Rohluna'n a hawng. He hunah hian sport discipline hrang hrang bakah, Scouts & Guides, Adventure, NCC, NSS, NYK, YHAI leh Mizoram State Sports Council te'n thisen an pe.

H Rohluna chuan, sport discipline hrang hrang leh youth service hrang hrang kaltlanga mamawhte tan thisen pek a ni chu lawmawm a tih thu a sawi a, "Mi dangte tana malsawmna thlentu nih hi Mizo nun ze mawi leh Kristian nun nen pawh a inmil hle. Mizo ṭhalai tam tak ruih theih thil tih vanga thisen pe ve thei lo an awm a, mi dangte tan thisen pe thei lote pawhin nun siamṭhat nacháng hria a, mi dangte tana malsawmna nih ve tum a pawimawh," a ti.

SYS director Zothanmawia chuan, SYS department huaihawtin sport discipline leh youth service-te'n district khawpui zawng zawngah thisen an pe dawn tih a sawi a; vawiin leh naktukah chhunzawm a ni ang.

Nimina thisen pek rûnpuiah hian Aizawl Civil Hospital Blood Bank-ah chuan Mizo HSS, Synod HSS leh Aizawl West College-a zirlai, National Service Scheme leh National Cadet Corps member mipa 160 leh hmeichhia 30-te'n thisen unit 190 an pe a ni.