MZU VC nghet dah thuai turin Mizoram BJP-in HRD an dawr

BJP, Mizoram Pradesh chuan thuchhuah siamin, Mizoram University-ah vice chancellor nghet dah a nih theih nan sorkar laipui hotute an dawr niin an tarlang.

Mizoram BJP chuan, MZU-ah VC nghet dah phûta Mizoram University Student’s Council (MZUSC) hmalakna chu âwm an tih thu an tarlang a, New Delhi-a chám mek Mizoram BJP president Dr JV Hluna'n MZU-ah zirna a pangngaia a kal leh thuai theihna turin HRD minister Prakash Javadekar leh official-te September 5 khan a sawipui niin an sawi.

BJP tarlan danin, HRD minister Prakash Javadekar chuan MZU-in VC nghet a neih thuai theihna tura hma a lak nghal thu Dr JV Hluna a lo hrilh a; September 5 vêk khan VC tur chu HRD Ministry-in an tifel a, prime minister Narendra Modi leh BJP national president Amit Shah-te pawmpuina lak a nih hnuah, India President pawmpui turin Rashtrapati Bhavan-a thawn nghal tum a ni.