KHAWTHLIR

State Referral Hospital (Zoram Medical College)-a thawk, ni nga kal ta hma lama Covid-­19 vei hnim hnai (positive contact)a hriatte swab sample endiknaah hripui vei an awm lo. Ni nga kal ta chhunga positive contact nei nia hriat­te chu Rapid Antigen Test hmanga endik an ni a, Covid-19 positive an awm lo. Hripui vei hnim hnai deuh dangte chu an intawh aṭanga ni nga hnuah endik an ni ang. 

Mizoram Synod rua­hman angin, nimin aṭang khan Mizoram Presbyterian Kohhrana pastor bial hrang hrangte chuan Bial Inkhawmpui an ṭan a, vawiinah chhun­zawmin an zo ang. Covid-19 léng vangin Bial Inkhawmpuiah hian vantlang inkhawm a awm lo a, palai tur pawhin palai ni sate bakah, kohhran tin aṭangin mi pahnih zel ruat a ni. Nimin khan nomination leh committee dangte an ṭhu a, vawiinah rorel inkhawm neih a ni ang.

Champhai South bial­tu MLA TJ Lalnuntluang­a, minister of state chuan­ ­nimin khan a bial chhung­a infiamna hmunhma, inkalpawhna kawngpui siamṭhat ngaite leh leimin vanga harsatna thleng theite a enfiah a; hmalak dan tur official leh khawtlang hruaitute nen an sawiho nghal.

July 22, Nilaini khan Lunglei Civil Hospital laboratory-ah TrueNAT hmangin mi 32-te swab sample endik a ni a, Covid-19 vei hmuh an awm lo. Endikte hi BSF sipai 24 leh Lunglei khawtual mi pariat an ni.

Irrigation & Water Resources department chuan thuchhuah siamin, an de­partment-a thawk pakhat chu Covid-19 positive contact a nih avangin a swab sample test a nih thu an tarlang a, "Result nghah mek a ni. Community spread a awm loh nan Chief Engineer, IWR department office chu July 23-29, 2020 chhung mipui dawr theih loha khâr a ni ang," an ti.