ZMC doctor leh futsal khelte lakah Police station-ah FIR thehluh a ni
Leitan venga Malsawma's Yard-ah July 20, 2020 zana mi eng emaw zatin futsal an khelh vang leh Zoram Medical College (ZMC)-a Covid-19 vei doctor pakhat a inkhelh ve chungchangah Vanramchhuangi, Chaltlang chuan nimin khan Bawngkawn Police Station-ah first information report (FIR) a thehlut.
Vanramchhuangi FIR-ah hian July 20, 2020 zan dar 7 velah City Hospital leh Grace Nursing Home staff-te an inkhel thu leh chutah chuan Grace Nursing Home-a thawk tawh, tuna ZMC-a thawk mek doctor pakhat, ZMC-a Covid-19 patient-te enkawl leh swab sample lak hna thawk nia hriat a tel ve a, a hnuah Covid-19 a vei tih hmuh chhuah a nih thute tarlan a ni.
Damdawi-in pahniha thawkte an inkhelh zawhah team pathum dang an inkhel zui leha hriat a nih thu te, chu'ngte avang chuan mipuiah Covid-19 kai darh theihna sang tak a awm thu te, veng ṭhenkhatah chuan lockdown puangin mipuiin harsatna an tawh phah thu te, June 30, 2020-a Mizoram sorkar thuchhuak - Order No.B-13021/101/2020-DMR/Pt-III-in inkhuahkhirhna thupek ṭhenkhat bawhchhiat a ni ngeia hriat a nih thute a tarlang bawk.
Vanramchhuangi chuan, "Sorkar thupek bawhchhiatna nasa tak a awm ngei niin a lang. Medical doctor, Covid-19 patient enkawltu leh swab sample latuin ama swab test result a hriat hmaa páwna chhuak a, mi zinga a inkhel ve hi mihring nunna atana hlauhawm natna hri theh darh thei zawnga fimkhur lo taka chetna ni ngeiin a lang bawk," a ti a; thil thlen dan chhui chhuak a, dan anga hma la turin a ngen a ni.
Police hnena ngenna
1. ZMC-a doctor thawk lai, fimkhurna tlachham taka inkhelhnaa tel ve, a hnua Covid-19 positive tih hriat chhuah, mipuia natna hri hlauhawm tak thehdarh thei zawnga a khawsak avangin.
2. City Hospital leh Grace Nursing Home-a thuneitu te, lockdown laia sorkar thupek kalha an staff-te futsal khela an chhuahtir avang leh punkhawmna an buatsaih avangin.
3. Inkhelhnaa tel zawng zawng te, lockdown bawhchhiaa pung khawma an inkhelh avang leh face mask vuah leh social distance maintain chungchanga thupek an zawm loh avangin.