Doctor aṭanga hripui kai theia ngaih Falkawn mi 25-te inkhung hrang

Zoram Medical College-a thawk doctor pakhat, July 20-a Covid-19 vei hmuh chhuah tâkin ZMC bula dawr pakhatah thil a lei tih hriat a nih avangin, Falkawn Village Task Force chuan, doctor-in hripui a kai chhawn theih àwmte an chhui zui nghal a, mi 25 an chhinchhiah tawh.

Doctor-in dawra thil a lei avang hian Falkawn task force chuan July 22, Nilaini aṭang khan an khaw mite chu ṭul bik thilah lo chuan páwna chhuak lo turin an hriattir a; contact tracing an buaipui nghal a ni. Falkawn task force tarlan danin, ZMC bula '6/12 Dawr' ah ZMC doctor Covid-19 positive-in July 18, 2020 tlaiah thil a lei a, chumi lai vel leh a hnu lamah pawh chu dawrah chuan tual­chhung mi eng emaw zatin thil an lei ve bawk. July 18 tlai dar 2 hnu lama 6/12 Dawra thil leitu zawng zawng chu task force-a inhriattir turin an chah.

Vanglaini palai zawhna chhangin Falkawn VLTF Chairman chuan, ZMC doctor-in 6/12 Dawra thil a lei hnua thil lei ve Falkawn mi an hriat theih chu mi 25 an nih thu leh chu'ng zinga mi pali chu dawr nghaktute an nih thu a sawi a, "Tunah chuan an swab sample test a la ni lo a, ni nga hnuah test tur tih a nih avangin kan la nghak. Mi 25-te hi páwna chhuak lo tura tih an ni a, mi dangte erawh chu ṭul bik thila an chhuah kan khap lo a, lo feh pawh kan khap lo," a ti.