Ramri leh kuhva chungchangah Mizoram leh Assam CM an inbia

Nimin khan Delhi-a Assam House-ah chief minister Zoramthanga leh Assam chief minister Himanta Biswa Sarma an inbia a, ramri leh kuhva chungchang bakah, thil pawimawh dangte an sawi dun.

Sorkar thuchhuah tarlan danin, ramri chungchangah state pahnih minister-te leh official-te'n inbiakna nei se, a ṭul angin chief minister ve vete pawh inbia se tih bawhzuiin, CM pahnihte hi an inbia a ni.

Chief Minister pahnihte hian minister leh official-te'n bulṭana inbiakna an neih chu tluang takin a kal zel nia an hriat thu an sawi dun a, ramri chungchanga inbiakna a awm chu lawmawm an ti.

Kuhva chungchang pawh Mizoram leh Assam Chief Minister te hian sawi dunin, dan lo anga kuhva ro lo lut chu Assam leh Mizoramah lo dan (block) vek a, Mizorama kuhva hring chin erawh engti kawng maha dang loa, a hralhna tur hmuna tlang tir zel an rel a ni.

Himanta Biswa Sarma chuan, Mizorama chin kuhva hringte an state-ah dan (block) a nih lohna atan theihtawp chhuah a tum thu sawiin, kuhva hring chu police-te hmanga tlang tir zel a tum thu CM Zoramthanga a hrilh.