Kum 2021-a mitthi chhinchhiah zingah Hmeichhia aiin mipa 2,211 in an tam

Nimin khan Econo­mics & Statistics depart­ment buatsaih Mizoram Statistical Abstract, 2021 leh Annual Report of Registration of Birth & Deaths Mizoram, 2021 tih chu an conference hall-ah Planning secretary Lalmalsawma Pachuau-in a tlangzarh. Lehkhabua tarlan a nih danin, kum 2021-ah Mizorama nau piang leh mitthi zingah mipa an tam zawk ve ve.

Lehkhabu tlangzarh inkhawm hi Economics & Statistics director B Lalrinhlua'n kaihruaiin, Lalmalsawma Pachuau-in a tlangzarh hnuah department officier-te'n lehkhabu buatsaih a nih dan an sawifiah.

Mizoram Statistical Abstract hi ṭum riat tihchhuahna a ni a, kumin hian ṭum danga awm ngai lo Mizoram economy thlirna, SDGs-a Mizoram dinhmun thar ber leh mahni intihlum zatte tarlan a ni. Annual Report of Registration of Birth & Deaths Mizoram hi chu kum tin tih chhuah ṭhin a ni a, tun ṭum hi ṭum 36 tihchhuahna a ni.

Annual Report of Registration of Birth & Deaths Mizoram, 2021-a tarlan a nih danin, kum 2021 chhungin Mizo­ramah mitthi 8,101 chhinchhiah an ni a, chung zinga 5,156 chu mipa niin, 2,945 chu hmeichhia an ni.

Hmeichhia aiin mipa 2,211 in an thi tam zawk. Thi zinga mi 444 chu kum khat an tlin hmaa thi an ni.

Kum 2021 chhung hian Mizoramah naupiang 24,314 chhinchhiah a ni a, chung zinga 12,424 chu mipa niin, 11,890 chu hmeichhia an ni. Hmeichhia aiin mipa naupiang 594 in an tam zawk.