World Alzheimer’s Day hman a ni

Nimin khan Alzheimer’s & Related Disorders Society of India (ARDSI), Mizoram Chapter bultumin World Alzheimer’s Day hman a ni a; Chanmari Veng aṭanga Millennium Centre thleng he natna vei mekte leh he natna vei boral tawhte hriatrengna memory walk neih a nih hnuah, Millennium Centre tualah inkhawm tawi buatsaih a ni.

Millennium Centre tuala inkhawm buatsaihah Social Welfare minister Dr K Beichhua chuan World Alzheimer’s Day puala hun hman chu Alzheimer natna chungchang hriatzauna kawngah a ṭangkai a beisei thu sawiin, memory walk-a tel zawng zawngte chu mi dangte zirtirtu ni ṭheuh turin a chah .

Alzheimer’s chu thluak lam natna, tute pawhin an vei theih, mahni leh chhungkua ṭheuha thleng thei a nih thu sawiin Dr K Beichhua chuan, "A tihdamna awm lo mah se, a enkawl dan kawngah te, chhungkua leh ṭhenawm khawvengte'n hriat-thiamna thuk zawk kan lo neih theihna atante inzirtir a pawimawh a ni," a ti.

ARDSI Mizoram Chapter president Vanneihtluanga pawhin thu sawiin, "He natna hi kan hrechiang a, a rapthlak dan te, a beidawnthlak dan te, chutihrual chuan Pathian malsawmna a nihziate kan hrechiang em em a ni," a ti a, hah tak leh rim taka dawhtheihna leh hma­ngaihna nena chhungte enkawl ṭhinte chungah an lawm thu a sawi.

Alzheimer natna hi Mizoramah chuan thluak sâwng natna tih a ni a, tihdamna awm lo mahse a veite enkawl danah, chhungkua, thenawm khawvengte leh khawtlang hriatthiamna, enkawl thiamna leh intawiawm tawnna chu thil ṭul tak a nih avangin a ngaihventu pawl ARDSI hi din a ni a, Mizoramah chuan September 21, 2015 khan din a ni.