Lunglei kawngpui dinhmun sawiho

Lunglei High Powered Committee (HPC) vice chairman Lawmawma Tochhawng, MLA kaihhruaiin nimin khan HPC conference hall-ah sorkar, pawl leh khawtlang hruaitute'n Lunglei khawpuia kawng siamṭhat hna kal mek dinhmun leh hmachhawpte an sawiho. Lunglei khawpuia tuiluan kawr (side drain) siamṭhatna tur project peih fel a nih tawh thu leh sorkarah cheng nuai 80 dil mek a nih thu tarlan a ni.

Lawmawma Tochhawng chuan Lunglei khawpuia kawng siamṭhat hna thawhnaah a mawhphurtute'n ṭan an lak tlan a ṭul thu a sawi a, "Lunglei district-a kawng siam mamawh chungchang pawh a changtu PWD hotute hnenah vawi eng emaw zat thlen niin, bawhzui zel a ni a, fur ruahtui tlak laiin duh angin hmalak chak theih a ni lo, " a ti a, Lunglei khawpuia Pialthleng panna kawng leh Khawiva panna kawngte ngai pawimawh hmasa turin department hotute a chah.

Lunglei DC Kulothungan A chuan September 19, 2022 khan PWD hotute nen Lunglei district kawng chungchang an sawiho thu sawiin, mamawh hrang hrangte Engineer-in-Chief hnenah lehkhaa thlen a nih thu leh September 23, 2022 hian ATL Lunglei - Thenzawl kawng siam hna thawktu Bhavya Constructions-te meeting tura an koh thute a sawi.

DUDO Vanthangpuii chuan, Lunglei khawpuia tuihawk luankawr (side drain) siamṭha turin project peih fel a nih tawh thu leh sorkarah cheng nuai 80 dil mek a nih thu a sawi.

PWD SDO Lalrammawia Renthlei tarlan danin, Lunglei khawpuia kawng siam hna thawk turin PWD hnuaia Class I contractor PC Lalthantluanga thlan a ni a, hnathawhna tur sum agreement amount chu cheng vbc 5.9 a ni. June 8, 2022-ah work order a chhuak a, June 20, 2022 aṭanga hna thawh ṭan niin June - December, 2022 chhunga thawh zawh tur a ni.

Lunglei khawpuia tui chhe paihna (drainage system) ruahman mumal a awm loh avang te, PHE pipe hlui tawh put (leak) nasa vang leh mimal in neitu tam takin kawngpuiah tui an paih mai avangin hnathawh a hautak thu leh kawng a tlo loh thu te, fur ruahtui tlak tam laia hnathawh chak a harsat bakah, tui luan kawr siamṭhat leh culvert siamṭhat tur tam tak a awm avangin hnathawh a kal chak theih loh thute a tarlang bawk.