Mizoramah sorkarin December 2023-ah Prepaid Smart Meter hman vek a tum
Power & Electricity Engineer-in-Chief chuan nimin khan electric bill pek dan thar hman tur chungchangah thuchhuah a siam a, eng chhit man pek lâwk theihna Prepaid Smart Meter chu December, 2023-ah hman vek tum a nih thu a tarlang.
E-in-C chuan sorkar laipui hmalaknain Revamped Distribution Sector Scheme hnuaiah consumer meter zawng zawngte Prepaid Smart Meter vuah turin hma lak ṭan a nih thu a tarlang a, "Sanction pawh department chuan an hmu tawh a, December, 2023-ah chuan Pre-Paid Smart Meter hi hman vek tum a ni, " a ti a, department hmalakna ṭha taka ṭawiawm turin mipui a ngen.
Pre-Paid Smart Meter chungchang
# Pre-Paid Smart Meter hian communication atan wireless a hman dawn avangin meter box dahnate hmun ualau deuh a ngai tawh dawn.
# Post-Paid aṭanga Pre-Paid a insawn a ngaih dawn avangin nakinah harsatna a awm loh nan electric bill bate pe fel zel tur leh contracted load-te pawh eng chhit tam lai ber ang mila lo in update turin ngen an ni.
# Consumer thar, dilna theh lut tawh, la tihfel loh emaw bill dawng lo emawte pawhin office lamah a rang lama chinfel a nih theih nan bawhzui tur a ni.