MIZOFED Supply Chain Main Hub hawng

Cooperation minister C Lalrinsanga chuan nimin khan Zuangtui, Aizawlah MIZOFED Supply Chain Main Hub (kudam) a hawng.

C Lalrinsanga chuan, main hub bakah district 11-ah kuthnathawktute thar chhuah leh thil dang Production Collection Centre sak leh ruahmannate a kal mek thu sawiin, "He supply chain main hub in a tinzawn ber chu consumer commodity mai bakah, kuthnathawktute thawh chhuah thlai leh thildangte suma chantirna hmun leh mipuite'n zangkhai zawk leh man man zawka an mamawhte an lei theihna hmun tur a ni," a ti a, Mizoram khaw tam takah farmers' society hrang hrangte hnathawh lo pui turin federation chu a khaikhawmtu a nih thu a sawi.

Federation hrang hrangte'n an hma ṭeuha hmalakna tur leh hmasawnna tur an neihahte ṭan la tura chahin Minister chuan, "MIZOFED hian tun dinhmunah bungrua wholesale lamah ṭan la tharin, Aizawl district leh a chhehvela mipui mamawh bungruate hralh a chak theih nan hma a la a, Packaging Unit leh Mobile Sales Unit te an indin thar a ni," a ti a, supply chain hub-a thawkte chu mipui rawngbawltu an ni tih inhre reng turin a chah.

MIZOFED Supply Chain Main Hub hi NEC aṭanga hmuh cheng nuai 639 senga sak a ni a; September 2021-ah hna thawh ṭan niin July, 2022-ah thawh zawh a ni. Tun dinhmunah bungrua cheng nuai 115 man a awm (stock) mek a, nimin khan Lungleiah bungrua chhuak hmasa ber thawn nghal a ni.