KHAWTHLIR

Thisen pe
ICFAI University, Mizoram NSS chuan nimin khan blood donation camp an buatsaih a, Civil Hospital, Aizawl tan thisen unit 71 an pe a, a petute mipa 68 leh hmeichhia pathum an ni.

Vbc. 3 hu Meth man
Mizoram Police hnuaia Special Narcotics Team-te chuan September 20, Thawhlehni zan khan Nathan R Khawbung, Lakhipur, Assam (tuna Bungkawn, Aizawl a cheng mek) hnen aṭangin methamphetamine kg. 1.016 an man a, a kungkaih dangte an chhuizui mek. Methamphetamine hi cheng vbc. 3 chuang man hu a ni.

Free Clinic
Mizoram BJP-te chuan prime minister Narendra Modi piancham lawmna kalzelah nimin khan Rawnte Zau, Tlungvelah free clinic an buatsaih.Mi 74 an inentir a, a thlawnin damdawi an pe nghal. Free clinic-ah hian BJP MLA Dr BD Chakma leh National Kisan Morcha executive member Dr Hruaitea ten mipuite hriselna dinhmun an endik a ni.

Kawng khar dawn
Vaivakawn Zohnuai aṭanga Ropaiabawk panna kawngchhakah lungtlak mai hlauhawm a awm avangin vawiin chawhma dar 11 aṭanga tlai dar 3 thleng thenfai hna thawh a ni dawn a, hemi hun chhung hian helai kawng hi khar tur a nih thu Aizawl Traffic SP Rodingliana Chawngthu chuan thupek chhuahin a tarlang. Hnathawh tibuai theia lirthei leh bungrua dah phal a ni lo.

Heroin man
Excise & Narcotics department (END) leh Central Anti Drugs Squad (CADS) ṭangdun chuan September 20, 2022 zing khan Tuirialah heroin gram 202 leh a neitua puh Vanchungbia (32), Haikhawl, Myanmar-a khawsa nia inchhal an man. END leh CADS vêk hian nimin khan Tuirial Airfield-ah heroin gram 147 leh a neitua puh Ṭhasuii (32) leh Duhneimawii, Myanmar ve ve an man bawk.

Form lak theih
Mizoram state quota-a State Medical and Technical Entrance Examination leh Joint Entrance Examination hnuaia seat ruak awm theite hauh duhte tan vawiin tlai dar 5 thleng Chaltlanga Higher & Technical Education department, Technical Wing pisaah dilna form lak chhuah theih a ni.

Kawng siam dawn
Hortoki leh Kawnpui inkar kawngpui chu September 24, 2022 zing dar 5 aṭanga September 26, 2022 zing dar 5 thleng SM Interior Private Ltd. te'n siam hna an thawh dan avangin Kolasib SP chuan hemi hun chhung hian kawngpui khar tur a nih thu a tarlang. Harsatna tawk emaw report emaw nei tan Kawnpui Police Station OC phone number 8974723770-ah biak theih a nih thu a tarlang bawk.