Hripui vei enkawl mek 186 an awm

September 20, Thawhlehni khan Mizoramah Covid-19 vei mi 45 hmuh chhuah a ni a, nimin khan hripui vei dam tawh mi 63 chhuahtir an ni. Nimin tlai khan Covid-19 positive enkawl lai mi 186 an awm a; nimin khan Covid-19 hri vei enkawl lai mi pakhat a thi.

Thawhlehnia hripui vei hmuh thar mi 45-te chu mipa 21 leh hmeichhia 24 niin, RAT hmanga hmuh chhuah vek niin swab sample 450 endik aṭangin positive zat chu 10% a ni.

Nimin zing dar 1:55 khan C Lalrinthanga (73), Lunglei Bazar Veng chu Lunglei DCHC-ah a thi a, natna dang nei tel a ni. Hripui a vei tih September 13, 2022 khan hriatchhuah a ni a, hemi ni vêk hian DCHC-ah dah luh nghal a ni.

Nimin khan hripui vei dam tawh mi 63 an chhuak a; district tina chhuak zat chu - Aizawlah 21, Saitualah 15, Lungleiah 11, Champhai leh Mamitah panga ve ve, Serchhipah pali, Kolasib leh Hnahthialah pakhat ve ve an ni.

IDSP record angin, Mizoramah Covid-19 vei 2,38,168 hmuh chhuah a ni tawh a, mipa 1,10,939 leh hmeichhia 1,27,229 an ni a, mipa aiin hmeichhia 16,290-in an tam zawk. Nimin tlai dar 5 thleng khan mi 2,37,259 (99.61%) chhuahtir an ni tawh a, mi 722 (0.30%) thi tawhin, enkawl mek mi 186 (0.07%) an awm.

Kum 2011 chhiarpui angin, Covid-19 vei hmuh tawh 2,38,168 chu state mipui zat aṭangin 21.82% a tling a, India rama state zingah a sang ber. Mi 1,000 zelah positive 217 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.