CYMA-in NHIDCL-te hnathawh an enfiah

Central YMA hnuaia NHIDCL hnathawhte vil tura din monitoring committee-te chuan nimin khan Zemabawk leh  ingsulthliah khaw inkara NHIDCL hnathawhte a hmunah an enfiah a, an leivung paihte dawlna tur siam vek turin an hrilh.

CYMA team-te hi chairman Lalhmachhuana, CYMA vice president-in hoin, NHIDCL executive director Virendra Jhakar hoin project design tu contractor leh Third Party Monitoring Team-te'n an lo dawngsawng a, leivung an paihna hmun leh paih dan te, leivung dawlna siam te, culvert-te leh kawngpui dawlna siam mekte an enho a ni.

NHIDCL hotute chu leivung an paihna tura phalna an neih ang ang copy pe turin an hriattir a, phalna an neihna hmun loah chuan leivung paih tawh lo turin CYMA team-te hian hrilhin, "Leivung in paih tawhna hmunahte leivungin environment a tihchhiat lohna atan leivung dawlna siam vek ang che u," an ti a, an lung hman ṭha lo nia an hriatte pawh thlak turin an hriattir.

Kawng tih zauh nana kopang lam an laihte a min tur ven nana tunlai technology thar Hydro-seedling & Mulching hmanga thlai, thing leh mau an chin mekte pawh enho a ni a, ram neitute'n zangnadawmna an hmuh tur ang angte rang taka an hmuh theih dan turte an sawiho bawk.

Silchar leh Aizawl inkara four lane kawngpui an laih leh dawnah chuan spoil bank tur felfai taka buatsaih lawk a, leivung dâwlnate siam hmasak vek an tum tawh thu NHIDCL hotute chuan CYMA team-te hi an hrilh a ni.