OIL-in Mizoramah oil beisei sang lo Gas laih chhauh ngei an inbeisei

Oil India Limited (OIL) hotute chuan, Mizoramah tuialhthei laih chhuah an inbeisei san loh thu an sawi a, "Gas erawh kan laih chhuah ngei kan inbeisei," an ti.

OIL hotute hian nimin khan Aijal Club-ah thuthar thehdarhtute an kâwm a; OIL chief manager (explortation) Rupiyot Phukan chuan, Mizorama oil leh gas zawn hna chu state dang aiin a harsa bik tih sawiin, "Metre 300 verh turin thla khatte hun hman a ngai. Hmun dang atana kan khawl design leh Mizoram leilung a inmil vak lo," a ti a, Mizoramah chuan oil leh gas zawn hna a thawh chak theih loh thu a sawi.

Rupiyot Phukan chuan, satellite aṭang­a an zirchianna aṭangin Mizoramah gas laih chhuah ngei an inbeisei tih a sawi a, "Tuialhthei zawn hna kan thawhnaah hian sorkar leh mipuite thlawpna kan hmu ṭha hle. Gas lai chhuak tur hian 20% vel chance kan nei a, kan lai chhuak thei a nih chuan kum 10 hnuah chuan Mizoramin a changkan phah ngei ang," a ti.

Oil India Chief Manager sawi danin, Maubuang leh Keifangah lei an verh tawh a, mahse, an duh ang an hmu lo a; lei verhna atan cheng vbc. 500 vel an sêng. Maubuangah chuan gas tlem azawng an hmu a, an verh tawhna bak verh belh tum mah se, technical thil avangin an verh zawm thei lo.

Tunah hian Thenzawlah lei verh leh turin an inbuatsaih mek a, mahse, lei verh tur hian inbuatsaihna tur leh tih tur a tam avangin hun a la duh rei deuh ang. Maubuang leh Keifangah hlawhchham tawh mah se, inbuatsaihna ṭha zawk nen, an hlawhchham tawhnate inzirna atana hmangin Thenzawlah chuan gas hmuh chhuah ngei an tum dawn a ni.

OIL hotute chuan, September 12-13, 2017 hian Kulikawn YMA Hall-ah Ministry of Parliamentary Affairs leh Ministry of Petroleum and Natural Gas nen ṭangkawpin 'India ram thar kan siam ngei ang' tih thupui hmangin exhibition an buatsaih dawn tih an sawi a; "Exhibition hi a duh apiang tlawh theih turin Union Minister for Science & Technology Dr Harsh Vardhan-a'n a hawng ang," an ti.

Oil India hotute sawi danin, exhibition hi Prime Minister-in New India Vision a kalpui mek, kum 2022 hmaa bawlhhlawh, retheihna, eirukna, firfiaka chetna, chi inthliarna leh hnam inthliarna paihbo tura hmalakna hnuaia neih tur a ni.

Exhibition-ah hian sorkar laipui prog­ramme hrang hrang bakah, First War of Independence, Non Cooperation Movement, Champaran Satyagraha, Dandi March, Quit India Movement leh India danpui pian chhuah a nih dante thlalak leh video hmanga en tur a awm ang.