Kolasib DC-in Oil Palm Mill a tlawh

Kolasib DC Dr H Lalthlang­liana chuan nimin khan Godrej Agrovet Ltd.-in Bûkvanneia Palm Oil Mill an din a tlawh a; hna an thawh dan, loneitute harsatna zir chian dan turte leh oil palm chíngtute tihhmasawn dan turte mill-a thawktute nen an sawiho.

Dr H Lalthlangliana chuan, loneitute tan Oil Palm Mill chhawr ṭangkai theiha a awm chu a lawm­awm rualin, a chíngtu an pung chak lo chu zir chian vat a ṭul thu a sawi a, "Oil palm huan nei, ngaihsak zui lote zir chian a ngai hle a, an harsatna hriat a, a ṭul anga hmalak a ngai a ni,” a ti a; Mizorama khawl changtlung tak awm chu loneitu tam thei ang berin ṭangkai taka an chhawr a duh thu a sawi.

Kolasib-a Agriculture officer J Rothanga sawi danin, Kolasib district-a khaw 30-ah oil palm chíng an awm a, kum 2020-ah ram hectare 6965.31-a zauah chìn a ni. Kumin April-June chhung khan Kolasib district bikah cheng nuai 30 chuang hû oil palm hralh a ni tawh. Bukvanneia Oil Palm Mill hi Oc­tober 28, 2014-ah hawn a ni. Kum 2010 aṭangin oil palm rah an lei khawm ­ṭan a, Kolasib district-ah April 2018 aṭanga June 2020 thleng khan Rs. 2,24,45,930.5 man an lei tawh a ni.