Nu pawngsuala thattua puh BSF sipai pahnih man an ni

July 17, 2017-a Silsury khua, Mamit district-a hmeichhe pakhat pawng­suala that zuia puh, 181 battalion Border Secu­rity Force (BSF) sipai pahnih - Dinesh Kumar leh Nilanjan Das-te chu Sep­­tember 5, 2017 khan Mamit police-te'n an man.

Thu dawn danin, July 16, 2017 khan Ranga­bi Chakma leh a thiannu, Sil­sury khaw mite chu ram­hnuaia chawhmeh zawnga an kalnaah BSF sipai nia hriatte nen an intawng a, Rangabi thiannu chu an pawngsual rawn a ni. Ranga­bi Chakma erawh chu a tlanbo thei a, a ṭhian­nu chu July 22-ah ram­hnuaiah a ruang hmuh a ni.

Ruang hlâwmnaa kal zinga mi police constable pakhat chu electric hrui uai fual lutuk a tawh palh avangin a hmunah a thi nghal bawk.

Mamit SP Narayan Thapa sawi danin, Dinesh Kumar leh Nilanjan Das te hi BSF hotute chuan police-te man an remti mai lo a, police-in Court aṭanga man phalna (warrant of arrest) an lak hnuah police-in an man a ni. An man dawn hian Dinesh Kumar leh Nilanjan Das te chu police station-ah an ṭhian dangte nen din tlartir an ni a, Rangabi Chakma chuan a ṭhiannu pawngsuala thattu nia a hriatte chu a kâwk a ni.