MZU-ah zirna chhunzawm theih a ni lo

Mizoram University Students Council (MZUSC) chuan MZU-ah vice chancellor (VC) nghet dah phûta September 6, Nilaini aṭanga tiam chin awm loa MZU-a thil tih tur reng reng an dan chu nimin khan an chhunzawm zel a, vawiinah pawh indan zel an la tum.

MZUSC-in VC nghet dah phûta MZU gate an danchah avang hian zirna a kal thei lo a, zirlai te, zirtirtute leh thawktu dangte campus chhungah an lut thei lo a; buaina chhuak erawh a awm lo. MZUSC hruaitute chuan, an hmalakna chu an chhunzawm zel rih tur thu an sawi.

Nimin khan MZU thuneitute chu vice chan­cellor mawhphurhna la mektu Prof. Lianzela hoin a pisaah an ṭhukhawm a, an kal zel dan tur an rél.

MZU hotute chuan, han thawk thei loa kal loh tawp chu dik lo an tih avangin MZU-a zirtirtu leh thawktute zawng zawng chu vawiin Zirtawpni aṭang chuan kal turin an hriattir a ni.

MZUSC hian VC nghet dah turin Union minister for Human Resource Development Prakash Javadekar hnenah August 28, 2017-ah ngenna an lo thlen tawh a, chutah chuan September 5, 2017 thleng an nghah tur thu an ziak. September 5-ah pawh VC nghet dah a nih loh avangin, September 6 aṭangin MZU-a academic leh non-academic activity zawng zawng tih a nih loh nan an indang ta a ni.