Gangtok-ah hmarchhak hriselna tur sawiho

Public Health Founda­tion of India (PHFI) chuan, Ministry of Development of the North East Region (DoNER), Sikkim sorkar leh STNM Hospital-te nen ṭangkawpin India hmarchhaka hriselna dinhmunin hma a sawn theih dan tur sawihona, North East Health Summit an buatsaih chu nimin Gangtok, Sikkim-ah ṭan a ni a, September 9 thleng a awh ang.

Summit hawn ni hi India ram hmun hrang hrang aṭanga doctor leh media sawmn bikte tana buatsaih a ni a, hmarchhaka vantlang hriselnain hma a sawn theihna atana hmalak dan tur te, chumi atana media tih tur a neihte leh hmalak zel dan turte an sawiho a ni.

Sawihonaah hian Vanglaini aṭangin news reporter John Zothansanga a tel a, Vanglaini-in kum tina Zoram Titi a buatsaih ṭhin chu hmarchhak state dang media-te tana entawn theih a nih thu sawiin, "Hetiang hun hi health awarness atan pawh thil ṭangkai tak a ni thei a ni," a ti.

Summit-ah hian Mizo­ram aṭangin National Health Mission-a mission director Dr Lalrozama leh Hospital & Medical Education department-a deputy director Dr Eric Zomawia te pawh an tel a, paper an present dawn a ni.