Joint NGO-te'n ECI hotute an kâwm
NGO Coordination Committee (Joint NGO) hruaitute chuan September 6, Nilaini tlai khan New Delhi-ah Chief Election Commissioner(CEC) chu Election Commission of India (ECI) meeting Hall-ah an kâwm a; Mizoram electoral roll-a Bru-te chungchang an sawipui.
Inkawmnaah hian ECI aṭangin CEC AK Joti bakah, Election Commssioner pahnih OP Rawat leh Sunil Arora te leh, ECI officer pali an tel.
Joint NGO aṭangin Central YMA president Lalbiakzuala leh treasurer J Lalsailova, MZP president Lalsangzuala Ngente leh gen secy L Ramdinliana Renthlei, MSU finance secy B Lalkhawngaihzuala leh Delhi Mizoram House-a ARC David Lalthantluanga te an tel.
Joint NGO hruaitute hian kum 2014-a Lok Sabha MP thlan dawna Bru, an duhthua Mizoram chhuahsante Tripura-a an awmnaa vote thlaktir duh lohna an lantir tawh thu an sawi a; ECI-in kum 2014-a a lo tiam tawh angin, kum 2018-a state assembly inthlan leh kum 2019-a Lok Sabha inthlan awm leh tura ECI hmalak dan tur an zawt a ni.
NGO Coordination Committee chuan, an duhthu ngeia Mizoram chhuahsantu Bru-te chu vawi tam tak Mizoramah let turin an ngen tawh tih sawiin, Mizorama lut duh lote chu tuna an awmna Tripura-ah awm hlen a, vote pawh Mizoram tana thlaktir tawh lo turin ECI hotute an ngen. Mizorama eng inthlanah pawh Bru-te chu Mizoram páwn atanga vote thlak an rem tih tawh loh thu te, Mizoram chhung aṭanga vote an thlak thei dawn a nih chuan an dodal loh thute an hrilh.
CEC AK Joti chuan, NGO Coordination Committee-te thu thlen chu Ministry of Home Affairs hotute nen an lo sawiho tur thu leh a ṭul anga hma an lo lak tur thu a sawi.
Joint NGO hruaitute hian Nilaini tlai vek khan Joint Committee on the Citizenship Amendment Bill, 2016 member Dr Vinay P Sahasrabuddhe pawh an hmu.
Citizenship Amendment Bill 2016 chungchanga Mizorama NGO-te leh political party zawng zawngin memorandum an thehluh copy an pe a; Joint Parliamentary Committee on Citizenship Amendment Bill 2016 member-te'n India state ṭhenkhat an tlawh kual hunah Mizoram tlawh ve ngei turin an sáwm a ni.