Pavalaite'n kawngpui thawm ṭha

Thenzawl Field Veng Presbyterian Kohhran pavalai member-te chu nimin khan Thenzawl khaw chhunga kawng­pui lûnlai leh an biak-in panna kawngpui ni bawk chu lirthei leh mihring tana kal hreh­awm khawpa a chhiat tawh avangin hna­tlangin an thawm ṭha a, mi 40 vel an thawk chhuak.

Thenzawl aṭanga thu dawnna chuan, kawngpui an thawm ṭhat chu Field Veng kâwn aṭanga biak-in panna kawng a nih bakah, SDO (Civil), Forest Office, Police Training School leh JNV School-te panna kawng a nih thu leh, kawng khuar chhe zual lai an hnawh chu metre 50 vela thui a nih thu an sawi.

Kawng chhe zual lai hnawh nan hian Tantia Constructions-in lung leh balu inpawlh GSB, truck phur thum an pe a, pavalai pawlte chuan man chawia JCB an hmang a, PWD roadroller chu a tui (diesel) tumin an hmang bawk.