Khawpui fai thlanna atan inbuatsaih

UDPA department-in khawpui fai inelna an huaihawt turah khawpui hrang hrangte chu an inbuatsaih mek a, Hnathialah pawh inbuatsaih nan September 6 khan SDO (Civil) Lalhruaitluangi hoin a pisaah sorkar department hotu te, V/C leh NGO hruaitute an ṭhukhawm.

Hnahthialah hian SDO(C) kaih­hruainain October 2009 khan Hnahthial Town Sanitation Committee din a ni a, hemi kum vek hian dumping ground siamin, lirthei hmangin bawlhhlawh paih ṭan a ni a, lirthei hman man chu chhung tin in Rs. 20 an thawh ṭhin.

Lunglei District Sanitation Task Force pawhin Mizorama khawpui fai inelna hmachhawn tura inbuatsaiha atan Nilaini khan Lunglei Venglaiah 'Thematic Cleanliness Drive' an buatsaih a, DC Lalzarmawi'n a hawng a, bialtu MLA Joseph Lalhimpuia pawhin a hmanpui.

Lunglei DC chuan, Lunglei khawpui tifai turin a chengte zawng zawng an pawimawh thu sawiin, "Kan in leh lo, kan chheh­vel kan tihfai mai bakah, faina lamah kan rilru kan her rem a ngai," a ti a; mipui rilruah faina tuh a pawimawh thu a sawi.

Thematic Cleanliness Drive hmannaah hian Clean Lunglei, Lunglei District VC Association leh YMA Sub Hqrs. Lunglei aiawhte pawhin thu an sawi.

Drive kalpui chhung hian Lunglei khawpui veng hrang hrangah faina hnatlangpui neih a ni ṭhin dawn a ni.

Mamitah pawh khawpui fai thlanna atan an inbuatsaih zel a, Nilaini khan DC Lalbiaksang­i hoin department hrang hrang hotute chuanveng hrang hranga hmalaknate a hmunah an enfiah a ni.