Bank of India-in Loan Sanction Day hmang

Bank of India chuan nimin khan The Grand Hotel, Zarkawtah an bank kum 112 tlin an lawm pahin Loan Sanction Day an hmang a, mi 30 hnenah loan chi hrang hrang, Rs. 1,80,66,180 an sem chhuak.

Bank of India-in Loan Sanction Day puala mi 30 hnena loan an pekte hi khuallian Rosiamngheta, AMC councillor-in a dawngtute hnenah a hlan a; mi 30 hnena loan an pek zat belhkhawm chu Rs. 1,80,66,180 a ni.

DAY-NULM hnuaia loan diltu mi pasarih hnenah Rs. 7,10,000, mi pakhat hnenah education loan Rs. 4,00,000, mi 11 hnenah Mudra loan Rs. 40,00,000, mi pakhat hnenah housing loan Rs. 18,00,000, mi pathum hnenah loan against property Rs. 1,04,90,000 leh, mi pasarih hnenah two wheeler loan Rs. 6,66,180 a ni.

Bank of India hotute chuan, an bank chu sorkar bank a nih angin, mipui ta a nih thu sawiin, Mizo mipui tan theihtawp an chhuah zel tur thu an sawi a; mipui tan engtik lai pawha inhawn an duh thu sawiin, bank loan scheme hrang hrang an neihte chu ṭangkai zawka hman tum turin mipui an chah.

Bank of India hi nationalised bank a ni a, branch 5,100 an neih zinga 56 chu India ram páwna awm a ni. Mizoramah kum 2011-ah an awm ṭan a, tunah hian branch pathum - Zarkawt, Ṭhuampui leh Upper Republic-ahte an nei a ni.