KHAWTHLIR

Tanpuina hlan
Mizorama footballer hránghluite chuan an sum thawh khawmte chu nimin khan mi dang ṭanpui nan an hlân. Mualpuia Muanna In (orphanage home) hnenah Rs. 20,000, khuarel chhiat tâwkte ṭanpui nan Central YMA-ah Rs. 20,000 leh TNT hnenah Rs. 20,000 an pe a ni.

Zo hnam chhan ni
Mizo Students Union (MSU) chuan, vawiin hian ‘Zo hnam chhan ni’ an hmang dawn. MSU hian Zo hnam chhan ni hi kum tin September thlaa chawlhkar hnihna Zirtawpni-ah an hmang ṭhin a, hnam dang dawra thil lei lo turin Mizo mipui an ngen a ni.

SA jubilee
Salvation Army, Bethlehem YP Corps chuan an kum 50-na, golden jubilee an lawm mek a, jubilee pualin zanin hian Musical Concert an buatsaih dawn bakah, jubilee mei an dêt ang. Jubilee lawmna pui ber chu September 10-ah an nei dawn a ni.

AR-in tanpui
1st Assam Rifles (Lushai Hills Battalion) chuan Nilaini khan Lawngtlai district-a Parva leh chhehvel khuaa chhungkaw harsa zualte hnenah solar lantern 400 leh buhfai kg. 2,500 an sem. Ṭanpuina dawngtute zingah hian hel hlauh vanga Myanmar aṭanga rawn lut Bandukbanga, Govisura, Simnasura leh Silsuri-a khua cheng chhungkaw 200 vel an tel.

Meizial man
Serchhip District Anti Tobacco Squad leh Legal Metrology department ṭangkawp chuan, nimin khan Thenzawlah squad drive an nei a, dan phal loha ram dang meizial zawrh eng emaw zat an man a, dan angin an tiral dawn a ni.

Bûkna enfiah
Lungleia Legal Metrology enforcement squad chuan, nimin khan Lunglei khawpui chhunga iron rod leh cement dawra bûklungte an enfiah a, an enfiah chinah bûkna hmanrua dik lo leh cement bûk tling lo zuar an hmu lo. Legal Metrology department hotute chuan, bûkna dik leh dik loh an enfiah zel dawn tih an sawi.