Khung hrante tana senso atan CM Relief Fund hmang turin ngen

Mizoram Pradesh Congress Committee (MPCC) chuan, Mizoram sorkarin state pawn aṭanga Mizo tangkhang rawn hawte khung hranna senso leh endikna senso a tumsak tawh lo a, mimal a tumtir tur chu ṭha lo an tih thu an sawi a; mimal tumtir ai chuan, Chief Minister's Relief Fund-ah Covid-19 dona tura sum thawh khawm hmang mai turin sorkar an ngen.

MPCC thuchhuah chuan, phai aṭanga rawn haw tam tak chu company-a thawk chunga an chhungte châwm ṭhin, Covid-19 vanga hlawh lak tur nei tawh lote an ni tih tarlangin, "Chuti chunga ni 14 qua­rantine an nih chhunga ei leh in man ni khatah Rs. 300 chawitir a, khum man chawitir a, test man thlenga chawitir tura sorkarin ruahmanna a siam hi ṭha kan ti lo hle," a ti.

Community quarantine centre-a khung hran tam tak chu kohhran, khawtlang mi inpete'n an ei leh in man an tumsak nasa tih sawiin MPCC chuan, "Sorkar senso tur nasa takin an lo chhâwk zangkhai tawh. Chuvangin, state dang aṭanga Mizorama haw turte an tam tawh lo a nih chuan, quarantine centre-a an awm man leh test senso zawng zawng sorkarin tumsak vek law law se kan duh," an ti a; CM Relief Fund-a Covid-19 dona atana thawh khawm cheng nuai 700 chuang la awm chu hmang mai turin sorkar an ngen a ni.

Congress party chuan, Covid-19 chu mipui vantlangah a darh loh nan quarantine centre-te inthlahdah loa uluk taka vèn chhunzawm zel ni se an duh thu sawiin, "India ramah hri vei maktaduai khat chuang an nih tâkah chuan, state dang aṭanga Mizorama lo lutte lakah pawh fimkhur taka hri vei endikna kalpui lehzual turin sorkar kan ngen a ni," an ti. Hripui vei an pung zel chu pawi an tih thu leh hripui vei enkawltute chungah an lawm thu an tarlang bawk.