Citizenship Amendment Bill hi Thil hlauhawm tak a ni - CM

Chief minister Lal Thanhawla chuan, Citizenship Amendment Bill, 2016 chu Mizo mipui tan thil hlauhawm tak a nih thu a sawi. Rajya Sabha MP Ronald Sapa Tlau chuan he Bill hi Rajya Sabha-ah a tlang a ring lo.

Lal Thanhawla hian nimin khan Congress Bhavan-ah thu sawiin, "BJP-te chuan Kristian leh Mosolman-te hi India sakhuaah an pawm lo a, foreign sakhuaah an ngai a, a theih ang anga thliar hran an tum a ni. Mizote hian hlauh tur dik tak kan hriat a pawimawh a, hlauh tur dik tak chu BJP-te hi an ni," a ti.

Citizenship Amendment Bill, 2016 hnuaiah chuan, Hindu-te chu khawi ram

aṭanga pawhin rawn tlanchhia se, India khua leh tuia pawmna tur dan a nia sawiin, CM Hawla chuan, "Kristian leh Molsolman-te chu khua leh tuia pawm tur zingah hian telh a ni lo. Nawrna avangin Kristian-te an telh leh ni mah se, min en hranzia a lang tawh tho," a ti a; Bill chu Mizote tan chuan a him loh thu a sawi.

Chief Minister sawi danin, Mizoram sorkarin Citizenship Amendment Bill, 2016 chu a theih ang angin a do a, ṭhahnem­ngaihna vangin sorkar sum hmangin Bill chung­changa sorkar laipui hotute NGO Coor­dination Committee hruaitute'n an dawr a ni.

Kawng chhiat vanga MNF-te'n total bandh huaihawt an tum chungchangah Lal Thanhawla chuan, "Bandh neih vang hian kawng ṭha thei chu ni se ni tin kan siam ang. An hunlaia kawng chhiatzia ngaihtuah se chuan an bandh hi an siam hauh lo ang, mahni mawng hlîm mai an ni," a ti.

Mizoram University-in kum khat chuang vice chancellor nghet a nei tawh lo chu thil âwm lo taka a ngaih thu sawiin CM Hawla chuan, "Kei ngei pawhin vawi eng emaw zat Prime Minister leh Human Resources Development Minister hnenah ziakin ka thlen tawh," a ti a; MZU-ah VC nghet dah thuai se tih chu Mizoram sorkar ngenna leh duh dan a nih thu a sawi.

Rajya Sabha MP Ronald Sapa Tlau pawhin thu sawiin, Citizenship Amendment Bill, 2016 pawm a nih chuan hmarchhak state-te a nghawng tur thu a sawi a, "Min nghawng dan chu a danglam deuh ang. Bill-ah hian Mosolman leh Kristiante hmaih kan ni a, sawiselna atan avangin Kristiante an telh leh a, a tak ramah an telh dawn em ka hre lo," a ti.

Citizenship Amendment Bill, 2016 chu vei a ngai tih sawiin Ronald Sapa chuan, "He thilah hian kan hruaitute'n ruahmanna fel tak an siam tawhin ka hria. Khuti lama kan hotute pawhin opposition party dang MP-te nen dodal dan tur an siam fel tawh," a ti a; Bill chu Rajya Sabha-ah chuan an phar thlak theih ngei a beisei thu a sawi.