MNF hotute'n Union Home Minister hmu
MNF president Zoramthanga leh treasurer Vanlalzawma te bakah, Ex-Mizo National Army (Ex-MNA) vice president C Zama leh treasurer PC Lalrinkima te chuan September 7, Ningani khan New Delhi-ah minister of state for Home Kiren Rajiju an hmu a; MNF leh India sorkar inremnaa la tihhlawhtlin loh thil pali tihlawhtling tura ngenna an thlen.
MNF thuchhuah chuan, MNF party hotute chuan Ningani vêk khan Ministry of Home Affairs-a hmarchhak bial changtu Joint Secretary pawh an hmu nghal a, Ex-MNA tana an thil ngenna an sawipui tih a tarlang.
MNF leh Ex-MNA ten MHA-a an ngente chu - Mizoram tana High Court hranpa pek, rambuai laia sipai ram luah man (rent) la pek loh pek, rambuai laia sipaiin Mizo hmeichhe pahnih an pawngsual vanga zangnadawmna Rs. 15,00,000 ve ve pek tura la pek loh Rs. 10,00,000 pek leh, rambuai vanga Lalzarliana (Thenzawl), Biakhluna (Kolasib) leh Vanlalhruaia (Churachandpur)-te thubuai tun thlenga la fel lo tihfelte a ni.