Kan sorkar hunah fa 3 leh a aia tam neite Hamṭhatna kan siamsak dawn - Lalduhoma

Zoram Nationalist Party (ZNP) president Lalduhoma chuan an party-in 'tam policy' an nei tih sawiin, inthlan leh hunah an party-in sorkarna an chan chuan fa pathum leh a aia tam neite tan ham-ṭhatna an siam dawn thu a sawi.

Lalduhoma hian nimin khan an party pisaah thuthar thehdarhtute a kâwm a; "ZNP chuan kan din tirh aṭangin ‘Tam Policy’ neiin, nanifesto-ah kan telh ziah ṭhin. Kan pun theih nan medical allowance, education allowance, residential allowance leh family maintenance allowance-te fa pathum leh a chung lam neite hnenah pein, 'Tam Policy' hi uar takin kan kalpui dawn," a ti.

Lalduhoma chuan, tam turin hrisel a ngai tih sawiin, ram chang­kangah chuan mihring dam chen chu chawhrualin kum 70-80 vel a ni tlangpui tawh niin a sawi a, "India ramah kum 64.7 a ni a, Mizoramah chuan kum 45-52 vel chauh nia hriat a ni," a ti a; Mizote an pun a, an dam rei bawk theih nan Health Policy ṭha tak nen an kal tur thu a sawi.

ZNP President sawi danin, India hi khawvela Family Planning Policy nei hmasa ber niin, kum 1952-ah a nei a; National Population Policy, 2000 hmangin fa pahnih aia tam neih loh tumin hma a la a, fa pahnih aia tlem neite chu maternity leave, child care leave leh scholarship-te a pe a ni.

Kum 1950 vela India ramah mihring maktaduai 360 vel an awm laiin ei leh barah an intodelh lo a, America ṭanpuina a dawng reng ṭhin. Tunah mihring maktaduai 1,200 vel an awm tawh a, thawk chhuaktu an tam avangin buh ei sen loh a thar chhuak tawh.

Lalduhoma chuan, ram dang pawhin birth control policy an nei tawh ṭhin a, mahse, an inchhîr vek tawh niin a sawi a; hmasawnna changkang turin tam a ngai nia sawiin, tuna khawvela ram hausa leh changkangte chu mihring bitna ram an ni vek tih a sawi.

Lalduhoma chuan, kum 2011 chhiarpui angin, Mizoram, sq.km. 21,087-a zauah mi 1,091,014 an awm a, chawhrualin, India ramah km. 1 bialah mi 382 zel awm ang a nih laiin, Mizoramah chuan mi 52 chauh awm ang a la nih thu a sawi a, "Arunachal Pradesh tih lohah India rama mihring thâwlna ber kan ni. Family planning kan lo inzirtir ve vak mai hi chu tihsual (blunder) lian tak a tling," a ti.

Mizote'n Mizoram an la luah khah zawh loh avangin ramri hrûla ram âwlte ram dang mite'n an luah nasat phah tih sawiin Duhoma chuan, "Ram awlin foreigner-te a híp lut mek a, kan buaipui ta hle a nih hi," a ti a; India ram state dangte'n tlêm an inzirtir a nih pawhin, Mizoram tan a ṭul ve lo tih a sawi.

ZNP President sawi danin, Mizo­ramah hian leileta siam theih ram hectare 50,000 vela zau a awm a, chutah chuan tuna India rama thar zat, hectare khatah ton 3 thar ni se, hectare 50,000-ah chuan mi nuai 10 ei khawp thar theih a ni.

Lalduhoma chuan, inthlah pun chu Pathian thu a nih thu sawiin, "Pian leh pian loh hi Pathian thu a ni... Family planning hian Bible leh kan kohhrante duh dan a kalh a ni," a ti a; Pathian ringtute chu ZNP 'Tam Policy' thlâwp turin a ngen a ni.