ZEM-te an thlen thui loh ka hlauhpui; PRISM an kal thui ka ring lo - Hawla

Congress party president Lal Thanhawla chuan, PRISM-te chu an chêt duh dan aṭangin an kal thui vak a rin loh thu a sawi a, "Zoram Exodus Movement (ZEM)-te pawh hi an thlen thui vak loh ka hlauhpui," a ti.

Lal Thanhawla hian nimin khan Congress Bhavan-ah thu sawiin, "PRISM hian in­thlante an chuh ve dawn a nih chuan Mizoram tan an hlauhawm khawp ang. An kalphung a hre chiang pawl ka ni a, mi beihna atan eptu lam apiang pawisa an dil ṭhin a, kei pawh eptu kan nih laiin min dil a, ka pe lo. Sorkar hnathawkte pawh an dil a, a pe duh lo chu eiruah an puh ṭhin," a ti a; PRISM chu an kal duh dan aṭangin an thlen thui vak a rin loh thu a sawi.

PRISM-in parliamentary secretary-te enkawlna senso rûl tur an phût chungchangah Lal Thanhawla chuan, "Dan ang thlapa ruat kan ni a, ka rûl lo ang. Rulh pawh a ngai lo. Intihlawmna atan ruat kan ni lo a, hna thawk tura ruat kan ni," a ti.

MPCC President chuan, ZEM-te'n thu­chhuah an siam hmasak berah Congress so­rkar chu hnam dang contractor/supplier-te hnen aṭanga chhiah la lo a, inthlan dawna sum dil ṭhinah an puh tih sawiin, "Kum 2012 aṭanga 2016-17 chhungin hnam dang contractor/supplier-te aṭang hian cheng vbc. 47.91 chhiah lak a ni," a ti a; ZEM-te thu dik lo tarlangah a puh.

ZEM-te chuan politics thianghlimzia hria se a duh thu sawiin Lal Thanhawla chuan, "Politics-ah hian kan chhia leh ṭha hriatna fím taka hmang chunga Pathian ráwn chunga kal chi a ni. Thu dik loa bul ṭan ngawt hi a dik lo a, ZEM-te hi an thlen thui viau loh ka hlauhpui khawp mai," a ti.

Congress President chuan, MNF hoin a mal din tur thu sawi mah se, NEDA-ah BJP an thawhpui tlat avangin an mal din a rin loh thu a sawi a, "An mal din a nih pawhin BJP-te nen seat an insiamrem ka ring," a ti a; tun hnaiah pawh MNF President chu New Delhi-ah BJP-te'n an koh thlak thu a sawi a ni.