Mizoram University kal lai a châwl

Mizoram University Students’ Council (MZUSC) chuan vice chancellor (VC) nghet pek phûta September 6, 2017 aṭanga MZU campus-a zirna leh thil dang tih tur zawng zawngte an dan chu an la chhunzawm zel a; kar leh aṭangin MZU hnuaia college-te pawh an tel tawh dawn.

MZUSC-in MZU campus-a lut turte an dannaah hian zirlai ṭhahnem tak an kal khawm a; MZU thuneitute lamin thawktute leh zirlaite dan pangngaia kal turin hriattirna chhuah mah se, thawktute chu campus chhungah an lut thei lo a ni.

Nimina an punkhawmnaah hian lung­awi loh lantir nan Human Resource Development minister Prakash Javadekar thlalak an hâl.

MZUSC vice president Malsawmsanga chuan, "Sorkar laipui koh eih dan hrang hrang kan ngaihtuah hnuah min hai der luih zel avangin, tun dinhmun hi thleng kan ni. Mimal inhuatna a ni lo a, hei hian an beng thleng ngei se kan tih vanga hâl kan ni,” a ti.

MZUSC hruaitute chu nimin khan MZU hnuaia college hrang hrang zirlai aiawhte nen an ṭhukhawm a; MZU-a VC nghet dah an phûtna tihhlawhtlin a nih theih nan kar leh aṭangin MZU hnuaia college zawng zawngin na zawka hmalak an rel.

MZUSC chuan thuchhuah siam­in, VC nghet dah phûta lung­awi lohna an lantir vanga ni thum chhung zirna a kal thei tawh lo chung pawha sorkar laipui aṭanga chhanna an la dawng lo chu zirlaite ngaih pawimawh lohna leh hmuhsitna lian taka an ngaih thu an tarlang a, "Kan thil phût tihhlawhtlin nan na zawka hmalak zel kan tum," an ti.