International Literacy Day hman a ni

Nimin khan Lunglei leh Serchhipah International Literacy Day hman a ni. Lungleiah chuan Saikuti Hall-ah hman niin, Lunglei SP Lalṭhafamkima Jongte-in a hmanpui.

Lalṭhafamkima Jongte chuan, International Literacy Day chu khawvel pum tan ni pawimawh a nih thu sawiin, "Khawvel ram hrang hrangin ziak leh chhiar lamah hma an la a, a bik takin ziak leh chhiar thiam lo ramah ṭan lak a ni. Kum 2020 hmain khawvel pumpuiah ziak leh chhiar thiamtir vek tum a ni," a ti.

Serchhipah chuan Literacy Day hi DIET conference hall-ah hman a ni a, DC Sang­chhin Chinzah-in a hmanpui. Serchhip district hi India rama district zinga ziak leh chhiar­ thiam tamna ber (percentage-ah) a ni.

Sangchhin Chinzah chuan, Mizote vanneihna chu, missionary-te'n Roman script hmanga hawrawp (alphabet) an siam leh zirna ngai pawimawh sakhua, Kristian an ni chu a ni thu a sawi a, "Kristian kan nih hma kum tam tak chhung leh kan nih hnu kum rei lo te chhung khaikhin pawhin kan danglamzia a lang. Tunah chuan India rama mipui náwlpui changkang ber pawl kan ni hial awm e," a ti.

Serchhipa Literacy Day hmanna hi DIET principal Lalalrammawia'n a kai­hruai a, lecturer Vanlalhruaii Thangluah-in 'Literacy Day, History, Issues & Challenge' tih thupui sawiin, Serchhip DEO Lawmawma'n International Literacy Day chungchang leh Serchhip district chhunga literacy san zelna tura hmalak dan a sawi.

United Nations Organisation pêng pakhat UN Educational, Scientific and Cultural Organization (UNESCO) chuan November 17, 1965 khan International Literacy Day hi kum tin September 8-a hman turin a rél a; kum 1966 aṭangin hman ṭan niin, ram tam takah hman a ni tawh. Kum 2006 khan thupui neiin hman ṭan a ni a, kumina thupui chu 'Literacy in digital world' a ni.