ISRT-in inkhawmpui an hmang
Indian Society of Radiographers and Technologist (ISRT) chuan Ningani zan khan Berawtlangah inkhawmpui an hmang a, chief minister Lal Thanhawla'n a hmanpui.
Chief Minister chuan, tunlai thiamna hmanga damlo enkawlna khawlte ṭangkai zawka hmang thei zel turin radiographer leh technologist-te'n dinhmun pawihmawh tak an luah thu a sawi a, "Damlote hnenah radiology hmanga inentirna ṭangkaizia leh hriselna kawnga a kaihhnawih thil awm theite pawh tlang taka an sawifiah ṭhina pawmawh," a ti.
ISRT chu pawl naupang tak ni mah se, hriselna mipuite hnena thlenna kawngah hna pawimawh ber ber thawktute intelkhawmna a nih thu sawiin Lal Thanhawla chuan, "ISRT-in anmahni puala thlakip chhuak emaw kum khat chhunga vawihnih thum chhuak, magazine hi Mizo ṭawnga lehlin ve ṭhin ni se," a ti a; magazine-a pawimawh zual deuhte phei chu Health department tihchhuah thin, 'Hriselna' chanchinbuah chhuah ṭhin ni se mipui tan a hlâwk tur thu a sawi.
Chief Minister chuan, damdawi lam thiam leh damdawi-ina thawkte chu an hna chanpualte an thiam a ṭul bakah, hriselna chungchang mipui hnena puanzar leh tlangaupui pawh an mawhphurhna ni tel thoa a hriat thu a sawi a, "Mizoram, mipui nuai sawmpakhat vel lek chennaah phei chuan hmalak a har lo. Health Mission hlawhtling taka kalpui pawh, a thawktu zawng zawng an inpumpek tak tak chuan thil harsa niin a lang lo," a ti.
ISRT inkhawmpui hawn inkhawm hi organising chairman Dr M Sarmah-in a kaihruai a, Chief Minister hian ISRT-in magazine a buatsaih ALARA a tlangzarh. Inkhawmpui chhim tur hian India ram hmun hrang hrang aṭangin ṭhalai 150 vel an tel a ni.