Ek-in sak dan tur sawiho

Lunglei District Swachh Bharat Mission (Gramin) chu nimin khan an chairman Lalzarmawii, Lunglei DC hoin a pisaah an ṭhukhawm a, an district chhunga ek-in nei ṭha lote ek-in saksak dan tur leh siamṭhat dan tur an sawiho.

Lalzarmawii chuan, kawng tinrénga hmasawn turin faina leh thianghlimna a pawimawh tih a sawi a; Lunglei district chu khawlaia inthiar awm lohna district ni tura theihtawp chhuah turin sorkar official leh tlawmngai pawl aiawhte thawhpuiah a sáwm.

PHE executive engineer Allan Lalṭhalura chuan SBM(G) kaltlangin Lung­lei district chu khawlaia inthiar awm lohna, chhung tinin inthiarna ek-in ṭha tâwk an neih vekna district ni turin chak taka hmalak mek a nih thu a sawi.

Meeting-a tarlan danin, Lunglei RD Block leh Hnathial RD Block-ah chhung­kaw ek-in nei lote tan ek-in saksak vek an ni tawh a, Bunghmun RD Block leh Lungsen RD Block-ahte ek-in sak tur hmabak 6,062 a la awm a ni.