KHAWTHLIR

Lirthei kal hun
Seling-Champhai kawng, NH-6 chu sâwt zawka siam a nih theih nan leh lirthei tlânte a felfai zawk nan Saitual SDO(Civil) R Vanlalsawma chuan lirthei lian intlân chhâwk dan tur a ruahman a; September 11, Thawhṭanni aṭanga hman tur a ni. Keifang aṭanga Seling lam pan turte chu Thawhṭanni, Nilaini leh Zirtawpniahte kal theih a ni ang a; Seling aṭanga Keifang lam lam pan turte chu Thawhlehni, Ningani leh Inrinniah kal theih a ni ang. Thupek hian Pathianni a huam lo.

Heroin man
Bawngkawn Police Station-a police-te chuan September 7, Ningani zan dar 8:45 khan Samuel Lalruatfela s/o H Thanzauva, Ramhlun South inti hnen aṭangin heroin gram 22.19 an man a, thubuai an siamsak. Heroin hi Rs. 65,000 hû a ni.

Siaha-ah training
Siaha District Legal Services Authority chuan nimin khan Siaha DC conference hall-ah 'Laws pertaining to motor vehicles’ tih thupui hmangin Siaha district-a lirthei neitute leh khalhtute tan training an buatsaih a; Siaha district-a lirthei neitu leh khalhtu kal khawmte chu dan zawm ngaite zirtir an ni.

MIS sîksawi
Mizoram sorkar chuan nimin khan notification tichhuakin, Mizoram Information Service (MIS) pathum a sîksawi. Kolasib IPRO JH Lalparmawii chu IPR Directorate-ah, Champhai IPRO Collin Hlychho chu Kolasib-ah, IPR Directorate-a awm lai Dr Lallawmkima chu Champhaiah awm tura tih an ni.

Lehkhabu thar
Dr Lalkhawngaihsanga lehkhabu ziah, 'Gilead Thinghnai' (Hriselna Lamtluang) tih chu nimin khan Health minister Lal Thanzara'n a tlangzarh. Health Minister chuan, natnate chu mihringte tawrh tur ni mah se, mihring siamchawp tam tak a awm thu a sawi.