Ayush Hospital-ah Covid-19 vei dah

July 21, Thawhlehni zan aṭang khan Zoram Medical College (ZMC) aṭangin Covid-19 vei mi 13 chu Integrated Ayush Hospital, Thenzawlah dah luh an ni.

Ayush Hospital-a Covid-19 vei dah luhte chu mipa 11 leh hmeichhe pahnih an ni a; mipa pakhat chu naupang a ni. Mi 13 zinga pariat chu BSF sipai an ni a, a bak zawng chu Mizoram mi an ni. Thenzawla Vantawng chanchinbu editor Liantluanga Renthlei zawhna Ayush Hospital resident medical officer Dr HT Zothanmawia'n a chhàn danin, Covid-19 veite chuan taksaah harsatna an nei lo (symptom a lang lo). Damdawi-ina dah luh an nih hian an hriselna enfiah vek a ni a, an taksa a ṭha a, an hriselna dinhmun pawh a ṭha.

Covid-19 vei, Ayush Hospital-a dahte chuan symptom an nei a nih chuan State Referral Hospital (ZMC)-ah emaw, damdawi-in dangah emaw dah leh tur a ni. Covid-19 vei dah a nih avang hian Ayush Hospital-a thawkte chu team pali-ah inṭhenin, member paruk zel an awm a, team pakhat zelin an riah chilh ṭhin ang.