Lunglei DTF-te'n Tlabung an tlawh

Lunglei District Task Force on Covid-19 member-te chuan nimin khan an chairman V Lalsangliana, district bawrhsap hoin Tlabung an tlawh a, Covid-19 laka invènnaa duty-te mamawh tur hrang hrang - medical & disaster response supply, silpauline, ORS, damdawi chi hrang hrang leh Rs. 1,20,000 an hlân.

Pawisa an pekte hi Khawthlangtuipui Group YMA hnenah Rs. 80,000 leh Tlabung Area Task Force hnenah Rs. 40,000 an pe a ni. V Lalsangliana chuan, Tlabung Sub-Division chu Bangladesh ramri hrûla awm a nih avangin Covid-19 laka invênnaah sorkarin rang taka hma a la a, February 10, 2020 aṭangin Kawrpuichhuahah ‘Coronavirus Screening Point’ siam a nih thu a sawi a, "Sub-Divisional Task Force on Covid-19 hmalakna ṭawiawma an thâ tichaktu tlawm­ngai pawl leh khawtlang hruaitute chungah kan lawm hle," a ti.

Tlabung Area Task Force-te leh riahbûk suala ramria duty YMA leh YCA volunteer-te inpekna fakawm a tih thu sawiin Lunglei DC chuan, "Ram venhim nana khawtlanga lungrual taka thawhhona a lawmawm. Ramri venhim hna thawktute chu tha thlah loa uluk leh fimkhur taka duty chhunzawm zel a ṭul," a ti a; an mamawhte sorkarah thlen vat ṭhin turin a chah. YMA Sub-Hqrs., Lunglei president Lal­rotluanga chuan, ramri venghima thla hnih chhung riahbûk suala duty mek Khawthlangtuipui Group YMA-te chu chhuanawm a tih thu a sawi a; thâ thlah loa ṭhahnemngai taka duty zel turin a fuih.

Khawthlangtuipui Group YMA hnuaiah hian YMA branch pali  - Tlabung Branch, Zodin Branch, Chawnpui Branch leh Chawilung Branch-te an awm a, May 3, 2020 aṭang khan ramri venghimin an duty ṭan. Riahbûk sual zawng zawngte chu Khawthlangtuipui Group YMA-in hmanrua a ngaihtuahsak a, ei leh in chu mi thil phalte thil khawm aṭangin YMA leh YCA-ahte sem ṭhin a ni.

Khawthlangtuipui Group YMA duty dan

    Tlabung Branch    : Tablabagh-ah an inkhuar a, YCA-te duty-na Bakmera, Hudusora leh Balukiasury-te an enpui.

    Zodin Branch    : Nursury Il-ah riahbûk sualin an rammu mek a, Bangladesh, Theka Bazar-ah India mi an kai rûk leh rûk loh te, Bangladesh mi an lo kai leh kai lohte an vil. YCA duty-te an enpui bawk.

    Chawnpui Branch    : Tiperaghat VC hnuaia Jaruldubasora khaw bul ramri vêngin an rammú a, Bangladesh aṭanga luhna khàn pawimawh tak tak an véng.

    Chawilung Branch    : Khojoysuri VC hnuaia Chondrobighat kalkawng border fencing gate no. 13-14 leh 14-15 inkar riah chilhin an véng.