Bawngkawn kawng zauh tum a buai ; Ram lâk tawh mimal kutah a lut leh

Urban Development & Poverty Alleviation (UDPA) department-in Bawngkawng kawngpui péngṭhuam zauh an tumnaa kum 2006-a sorkarin mimal ram a lâk tawhah harsatna a awm a, hei vang hian kawngpui hi zauh theih a ni dawn em tih hriat a ni lo.

Vanglaini thu dawn danin, Bawngkawna Sairang panna, Ramhlun panna leh Chaltlang panna kawng pengṭhuam zauhna turin Lalṭhai w/o Lalrinmawia (LRM), Ramhlun South ram, Chaltlang Lily Venga mi chu MNF sorkar lai, kum 2004 khan a neitu dàwr ṭan a ni a; Lalṭhai chuan kum 2005-ah sorkarah a hlan a, a LSC no. 10312/01/631 of 2002 chu land lease-a siam niin, MNF general headquarters President hminga dah a ni. MNF President hminga land lease siam a niha land lease no. chu 117 of 2005 a ni.

Ram hi bigha 0.08 (square metre 113.04)-a zau, Kawngpui zauhna tura ram a pek avang hian Lalṭhai chu sorkarin PMGSY hnuaiah cheng nuai 297.84 man kawngpui laih hna, Tuivai kamah a pe niin thu dawnna chuan a sawi.

MNF President hminga land lease siam, Certificate of Land Lease-a Terms and Condition-ah chuan, land lease chu kum 25 atan (September 11, 2030 thleng) a nih thu leh, a tawp hunah tihnun (renew) theih a nih thu te, ram chu a pumpui emaw, a ṭhen lai emaw hralh, mi dang hnena pek leh hlan phal a nih loh thu te, ram chu hman ṭangkai a nih loh chuan a neituin sorkarah a pe tur a nih thute a chuang. Heng bakah hian thil dang eng emaw zat ziah lan a ni bawk.

Mizoram sorkara UDPA department chuan Bawngkawn kawng péngṭhuam hi zauh tumin tun hnai kum hnih kal ta vel aṭangin hma a la ṭan a, mahse, MNF President hminga dah chu mimal pakhatin mimal vek hnena a hralh avangin harsatna an tâwk ta a ni.

MNF President hminga dah, land lease no. 117 of 2005 chu kum 2015 khan Dr Don Sapremsanga Halliday s/o H Sapthang­liana Halliday chuan Lalrodingi d/o R Lalthanliana, Mission Veng hnenah Rs. 1,50,00,000-in a hralh.

Ram hralh leh lei chungchanga affidavit an siama a lan danin, Lalrodingi chuan kum 2015 tawp lamah (a ni tak an hre lo) Don Sapremsanga hnenah ram a leina man cheng nuai 150 a hlan a, chumi hnu, March 15, 2016-ah Don Sapremsanga pawhin ram pass lehkha pawimawhte chu Lalrodingi hnenah a hlan.

Affidavit-ah hian Dr Don Sapremsanga leh Lalrodingi ten hming an ziak a; hriatpuitu - Vanlalchhawna, Mission Veng, Zothanpara, Mission Veng leh Isaac Lalrinchhana, Tuikual South ten hming an ziak a ni.

Thu dawnna chuan, Lalṭhai ram, sorkarin kawngpui zauhna atana a lak a, MNF President hminga dah a nih hnua Dr Don Sapremsanga'n a ram anga a chhàl theih chhan an hriat loh thu leh, mi dang kuta a awm leh chu MNF President hminga land lease siam a niha Terms and Condition kalh a nih thu an sawi a; tunah mimal hminga a awm leh tak avangin kawngpui zauh turin hmalak theih a ni rih lo tih an sawi bawk.

MNF President hminga land lease siamah, Land Revenue & Settlement department-in ram chu mi dang hnenah hralh, pek leh hlan phal a nih loh thu an ziah chian avang leh sorkarin kawngpui zauh nan hman a tum tih thâwm a awm avangin Don Sapremsanga hnena leitu Lalrodingi hian chân mai a hlauhthâwng a; chuvang chuan, sorkarah a leina ang zat (cheng nuai 150) zangnadawmna pe turin April 2017 khan a dil nia thu dawn a ni.