Legal Metrology-in Sa bûkna an enfiah

Lungleia Legal Me­trology enforcement squad-te chu September 9, Inrinni zing khan Lungleia bazarahte an duty a, vawk sa, bawngsa, ar sa, sangha leh ui sa hralhte bûk a tlin leh tlin loh an enfiah.

Legal Metrology en­forcement-te hian bûkna hmanrua an enfiah bakah, mipui sa lei sate chu bûk a tlin leh tlin loh electronic weighing machine hmangin an enfiahsak bawk a; ngaihmawhawm khawp bûk tling lo an hmu lo. Bûkna hmanrua annual verification tih ngaite chu verification ti turin an ko nghal a ni.

Hetih lai hian, Lunglei Super Market-a wholesale dawr pakhat aṭangin dan loa lak luh ram dang meizial (foreign cigarrette) eng emaw zat an man a; chungte chu - Farstar carton khat leh V cigarrette carton 48 an man.

Lungleia Legal Metro­logy department hotute chuan, Lungleia gas thleng reng reng chu uluk takin an lo enfiah ziah tih sawiin, "Lunglei district chhunga sem tur, Lunglei paltlanga gas phur, Lungsen, Chawngte, Tlabung leh Thingfala gas agency-te pawh theih ang angin check ṭhin a ni," an ti.