Mizoramah pum cancer a tam ber

Public Health Foun­dation of India (PHFI)-in Development of North East Region (DoNER), Sikkim sorkar leh STNM Hospital-te nen ṭanghoa Gangtok, Sikkim-a North East Health Care Summit an buatsaih chu Inrinni khan zawh a ni. He hunah hian Hospital & Medical Education department deputy director Dr Eric Zomawia chuan Mizorama cancer hluar ber chu pum cancer a nih thu a sawi.

Dr Eric Zomawia chuan, Mizoram cancer dinhmun sawiin, "Mizo­rama cancer a hluar ber chhan chu zûk leh hmuam bakah, saum leh sa rêp kan ei nasat vang a ni," a ti a; saum leh sa rêp chu Mizo chawhmeh duh ber zinga mi a nih avangin thunun harsa tak tur a nih thu a sawi tel.

Zûk leh hmuam kawngah Mizoramin hma nasa taka a lak thu sawiin Dr Eric Zomawia chuan, "Tunah hian anti tobacco squad ṭha tak neiin, an thawkrim em em a, hma kan sawn zel a ni," a ti.

Summit kaihruaitute zinga mi Dr Lalrozama, NHM mission director chuan, thingtlanga awm duh doctor an váng chu Mizoram harsatna a nih thu sawiin, "Hmanni lawkah NHM hnuaia lak thar doctor chu Aizawl páwnah kan sawn a, a chhanna chu bànna lehkha a ni. Hetiang thil hi chinfel vat ṭul tak, a tih dan tur váng tak si a ni," a ti.

Thingtlanga awm tur doctor hmuh a nih theih nan hmarchhak state-te'n inthuruala hmalak dan ngaihtuah a ṭul thu a sawi.