Vanglaini Zirchianna ; Vishal Megamart leh Bazar India nghawng

Aizawla sumdawngte chuan Bawngkawna Vishal Megamart leh Chaltlang North-a Bazar India hawn chuan an sumdawnna a nghawng mek niin an sawi. Hetihlai hian dawr ṭhenkhat an sumdawnna nghawng lutuk loa inngai an awm ve bawk.

Vanglaini palaiin a kawm kualnaah, Bawngkawna thawmhnaw zuarte chuan Vishal Megamart hawn tirhah an inhralh chhiat phah laiin, a hnu deuhah a nghawng lutuk lo niin an sawi a; mahse, Bazar India hawn a ni leh ta chuan a nghawng niin an sawi.

Thawmhnaw zuarte

Bawngkawna naupang thawmhnaw zuar Melody chuan, Vishal-in an thil zawrh titláwm anga a than avangin mipuiin pan phah mah se, naupang thawmhnaw an zawrh nen a man a inang nual niin a sawi a, "Vishal awm hnuah ni khatah kan inhralh danah hmun thuma ṭhena hmun khat vela a hêk a, Bazar India awm hnuah hmun thuma ṭhena hmun hnihin ka hek zawk," a ti.

Kum 2013 aṭanga dawrkai, mipa thawmhnaw zuar Zoramchhani chuan, a thawmhnaw zawrhte chu a ṭha chi deuh hlir a nih avang leh Vishal-in an neih ve loh avangin a nghawng ve vak lo niin a sawi a; Bazar India-in thawmhnaw an neih ṭhat ve avangin a nghawng nia sawiin, "Kan hralh ṭhat changin Bazar India awm hmaa kan hralh chhiat ṭum ang vel kan hmu ṭhin," a ti.

Dawrkai nu pakhat chuan, an thil zawrh lei tum an tlem phah nia sawiin, "A hma chuan thla thar tirah kan inhralh ṭha ve

ṭhin a, ni khatah Rs. 20,000, Rs 17,000 vel lei châng kan nei. Bazar India awm hnuah chuan ni khatah Rs. 3,000 velte kan inhralh ṭhin," a ti. Dawrkai nuhote chuan, Bazar India awm hnuah an inhralh theih loh phah niin an sawi. Mipa leh hmeichhe puitling thawmhnaw, cosmetic leh toys zuar nu pakhat chuan, phai lamah thawmhnaw lain thla tin ka kal ṭhin a, mahse, tunah chuan awmzia a awm tawh lo hle niin a sawi bawk.

Bawngkawna dawrkaite chuan, Vishal Megamart leh Bazar India-te chu sorkarin tihtawpsak se a duh ber thu sawiin, "Mahni hmasial vang ngawr ngawr ni loin, hun rei tak aṭanga kan eizawnna min tihtawpsak a ni dawn a, keini tan chuan chhiatna a ni," a ti.

Thawmhnaw zuarte chuan, an thawmhnaw zawrhte chu ti tlawm ve se tia mi tam takin an sawi chu sawifiahin, "Tax chawi a tam a, motor hman man nen, dawr luah man a tam nen, kan hlêp ṭha chiam bik lo. Hlep tlem tê tê pawh a awm a, kawr man toah kan hlep tam veleh deuh a, mahnia kan zu lak pawhin kan ti to ngam chiam chuang lo," an ti. Bawngkawn bazara dawrte hi Rs. 7,000 te, Rs. 4,000-tein an luah tlangpui.

Bungraw zuar

In chhung bungraw zuar hmeichhe pakhat chuan, Vishal Megamart-in an zawrh leh a zawrhte chu a quality a inang lo nia sawiin, chawhrualin, a nghawng na lutuk loa a hriat laiin, thla thar hlima an inhralh ang chu an pha lo niin a sawi.

In chhung bungraw zuar pa pakhat chuan, "Vishal awm hnu nen chuan tlem chuan a inthlau deuh chuan kan hria a, mi pawh an lo kal tlem deuhin kan hria," a ti a; Vishal-a kal a, duh ang hmu loten anmahni chu an dawr haw ṭhin niin a sawi a ni.

Millennium Centre

Millennium Centre-a dawr nghak ṭhenkhat chuan, Vishal Megamart leh Bazar India ten a nghawng ṭan nia an ngaih thu an sawi laiin, dawrkai ṭhenkhat chuan discount rûnpui an kalpui lai a nih avangin mipuiin an bâwr ve rih a, a nghawng dan an hrethiam rih lo tih an sawi.

Pheikhawk leh readymade thawmhnaw zuartu Lalrinliani chuan, Vishal chuan an thil zawrh ang an zuar ve lem lo tih a sawi rualin, Millennium Centre-ah mihring kal an tlem phaha a hriat thu a sawi a, "Dawr chhuahsana inkhàr chhàwntir an awm zauh zauh a, bazar a pawisa léngvâk a tlem phah. Mizo dawr cheng 99 dawra awm reng pawh Vishal-a Rs 150-a va lei, inchhîr lehte pawh an awm a ni," a ti.

Malsawmdawngkimi Ralte chuan, hmeichhe thawmhnaw an zawrh ang Vishal lamin zuar ve lo mah se, thawh chhuah ngai reng site'n a tláwm nia an hriatah pawisa an hman nasat avangin indirect-in an tuar niin a sawi a; hun a kal a, a zia leh deuh nia a sawi laiin, Bazar India a awm leh tak avangin an dinhmun a ṭha lo leh deuha a hriat thu a sawi.

Thawmhnaw zuar neitu Biaka chuan, a thil zawrh chu Bazar India leh Vishal aia

ṭha nia a hriat avangin a nghawng vak loh thu a sawi a; Vishal leh Bazar India-a kal a, an duh zawng hmuh loh vanga an hnena kal leh pawh an tam niin a sawi.

Vishal-ah tláwm zawka eichawp an zawrh avangin Bawngkawn, Chaltlang leh Ṭhuampui vela eichawp zuarte chu a nghawng a rin thu sawiin, "Sumdawng lian an ni lo a, anni hi a la nghawng nat ka ring. An têt deuh avangin society-ah voice an nei pha vak lo a, an eizawnna a chhiat a, kan ngaihthah chuan sual a pung thei a, kan ngaihvenpui a ngai," a ti.

Aizawl New Market

Aizawl New Market-a thawmhnaw zuar Malsawmdawngliana chuan, Vishal leh Bazar India awm tak vangin an inhralh dan a nghawng nghal rum rum lo tih a sawi a, "Nakinah chuan an la rawn inzár pharh zel ang a, kan ṭhenawm state-te tawrh ang hi kan la tuar dawn e, kan ti a; chumi hunah chuan kan tu leh fate hi vai hnuaia thawk a, inhlawh fâk a la ṭul dawn a ni," a ti. Kum dangah chuan naupang inkhawmpui dawnah an inhralh ṭha ṭhin a, kuminah erawh chuan ri laih laih pawh a awm tawh lo niin a sawi.

Thawmhnaw zuar Janet-i chuan, "Mizo tlem tê kan awm lai a, saw laia ni tin cheng nuai 10 dawn an lei avangin kan tuar dêr tawh a, kan tuar lo emaw kan tih hian kan tuar der tawh," a ti a; insiamṭhat an ngaihnaah insiamṭha ve mah se, mipui sum tam zawk Vishal leh Bazar India-ah a luh avangin an hnena thawmhnaw lei tur mipui an tlem niin a sawi.

Janet-i chuan, Mizo dawrkaite'n an thil zawrh titláwm ve se ti an awm chung­changah, "Item inang bikah chuan kan tihtona kan hre lo. A leitute hian an thil lei an hre chiang lo fo. Vishal leh Bazar India-a an zawrh ang chu Zion Street-ah pawh a awm ve ṭeuh," a ti.